ہماری ٹیم ایک شادی شدہ جوڑے، ایک غیر ملکی ، اور دو مقامی ساتھی کارکنوں پر مشتمل ہے ،جن کے نام سنجے اور جان ہیں۔  جان، سنجے کا چھوٹا بھائی ہے ۔ ہم سب مل کر خدمت کرتے ہیں۔  ہمارے لئے ” ہم ” یا ” وہ ” کے الفاظ کوئی معنی نہیں رکھتے۔ ہم سب یسوع کے شاگرد ہیں ۔ہم اُس کا حکم سُننے اور اُس پر عمل کرنے کی کوشش کرتے ہیں۔ جب ہم میں سے کوئی یہ محسوس کرتا ہے کہ ہمیں اپنے  کام کے طریقہ ِکار میں کسی تبدیلی کی ضرورت ہے، تو ہم بڑی عاجزی کے ساتھ ایک تجویز پوری ٹیم کے سامنے پیش کرتے ہیں، اور پھر خُدا سے درخواست کرتے ہیں  کہ وہ اپنے کلام کے ذریعے تجویز کی تصدیق اور تائید  کرئے۔ 

ہم غیر ملکی شروع سے ہی اس نظریے کے ساتھ میدان ِ عمل میں نہیں آئے تھے ۔ ہم نے خدمت کے میدان میں کئی سال اپنے ہی طریقوں پر عمل کرتے ہوئے گذارے۔ ہم مصروف رہے لیکن نتیجہ خیز ثابت نہیں ہوئے۔ سال 2011میں ہم نے شاگرد سازی کی تربیت میں شرکت کی، جس  کے لئے ہماری ایجنسی نے تعاون کیا تھا۔ اس تربیت نے ہماری زندگیاں بدل دیں ۔ ہم نے دو ہفتے تک خدا کے کلام کا گہرا مطالعہ  کیا ۔ہم نے مشنزکے بارے میں کوئی کتابیں پڑھیں اور نہ ہی مشن کے جدید نمونوں کا مطالعہ کیا۔ ہم نے بس اپنی اپنی بائبلیں  کھولیں اور ایسے سوالوں کے جواب تلاش کرنے لگے جیسے ، ” کیا یسوع کے پاس نارسا لوگوں تک پہنچنے کے لئے کوئی خاص حکمت علمی تھی ؟”

تربیت کے ان سِلسلوں کے ذریعے، خُدا نے ہمارا نُکتہ ِنظر تبدیل کر دیا ۔ سب سے اہم بات یہ تھی کہ ہمارے سامنے اب ایک سوال تھا :” کیا ہو اگر ہم اپنی اپنی مہارتوں کے میدان  ( انجینئرنگ ، تدریس ، انتظامی مہارتیں  ، مواصلات ) سے ہٹ کر اُن چیزوں پر توجہ دیں جن کے کرنے کی واقعی اشد ضرورت ہے ؟”  خدمت کے میدان میں  گذارنے والے تمام سالوں کے دوران ہم نے اپنی مہارتوں کے استعمال پر توجہ دی تھی۔ سوال ہماری اپنی مہارتوں کے استعمال کا نہیں تھا بلکہ سوال  یہ تھا ،” بھٹکے ہوؤں کو نجات دلانے کے لئے کیا کرنے کی ضرورت ہے ؟” اس سوال کے جواب میں  ہماری مہارتوں کی ضرورت ختم ہو جاتی تھی ، اور اُن مہارتوں کی ضرورت پڑتی تھی جو ہمارے پاس نہیں تھیں، جیسے اجنبیوں کو دوست بنانا،  غیر ایمانداروں کے ساتھ مل کر دعا کرنا،  اور لوقا کے دسویں باب میں دی گئی ہدایات پر عمل کرنا ۔ ہمیں یہ جان کر واقعی اطمینان ہوا کہ متی   28:19 میں دیئے گئے یسوع کے حکم کی تعمیل  کے لئے ہمیں اپنے طریقہ ِکار،  اپنی شخصیات اور سوچ یا ذہانت کے معیار پر انحصار نہیں کرنا تھا ۔ یسوع نے اپنے ابتدائی شاگردوں کو اپنے پیچھے چلنے کے لئے اس نے اس لئے نہیں کہا تھا کہ وہ تمام لوگوں میں  سے بہترین اور ذہین ترین تھے۔  وہ ان پڑھ مچھیرے ، محصول لینے والے گنا ہ گار اور استحصال کا شکار، غریب  لوگ تھے، لیکن انہوں نے یسوع کے حکم کی تعمیل  کی ۔

یہ حقیقتیں جان کر ہمارے دل جوش سے بھر گئے ۔ہماری خدمت   کی زندگی میں پہلی مرتبہ ہم نے خُدا کی اس خواہش پر توجہ مرکوز کرنا شروع کر دی کہ ہمیں اپنی ذاتی مہارتوں کو ایک طرف چھوڑ کر دوسروں کو بچانا ہے۔ ہم نے نئے طریقہِ کار استعمال کرنا شروع کر دیئے جن میں مندرجہ ذیل شامل تھے :

(الف)      ذاتی فرمانبرداری ( ایسے لوگوں کی تلاش جو انجیل کے لئے اپنے گھرانوں کے دروازے کھول دیں ) 

(ب)     زیادہ پُر جوش اور مؤثر دعا ( دعا محض ایک ذاتی سرگرمی نہیں رہی بلکہ دعا ہمارے کا م اور خدمت کا لازمی حصہ بن گئی )

( ج)       موجودہ ایمانداروں کو اس کاوش میں اپنے ساتھ  شراکت کا نصب العین عطا کرنا ۔

(د)        دلچسپی رکھنے والے مسیحیوں کی تربیت 

(ہ)        اُن لوگوں سے تربیت حاصل کرنا جو اس کام میں ہم سے آگے تھے ۔ 

تربیت حاصل کرنے کے چند مہینوں کے بعد ہماری ملاقات سنجے نامی ایک واقف کار سے ہوئی ۔ہم اُسے گذشتہ کئی سالوں سے ملے نہیں تھے۔ ذیل میں  اُس میٹنگ کے بارے میں سنجے کے   تاثرات اُسی کے الفاظ میں پڑھیئے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں ایک مسیحی خاندان میں پیدا ہوا ۔ہم مسیحی روایات پر کاربند رہتے تھے۔ جب میں بڑا ہوا تو میں نے بائبل کی چار سالہ تعلیم لی اور پھر میں بائبل کا معلم  بن گیا۔ وقت کے ساتھ ساتھ میں نے اپنے ملک کے وسیع رقبے پر پھیلے ہوئے دیہی علاقوں میں 17 مختلف چرچز کی ابتدا کی ۔ 

دسمبر 2011میں میں دہلی کی ایک سڑک پر واکر بھائی سے ملا ۔انہوں نے مجھے اپنے گھر پر چرچز کی تخم کاری کی تربیت کی دعوت دی۔ اپنی زندگی کے اُس دور میں میں ایک بڑا مغرور شخص تھا۔ میں ایک بہت بڑی منسٹری چلا رہا تھا ۔ میں نے ایک سکول اور بائبل کا تربیتی مرکز بھی قائم کر رکھا تھا۔ میں نے سوچا ،”یہ شخص مجھے کیا سِکھا سکتا ہے ؟” سو میں نے وہاں نہ جانےکا فیصلہ کیا۔

 تاہم، ایک مہینے بعد میں نے   انہیں نئے سال کی مبارک باد دینے کے لئے فون کیا  ۔ انہوں نے مجھ سے کہا ،”میں نے آپ سے چرچ کی تخم کاری کی تربیت کے بارے میں بات کی تھی۔ آپ کیوں نہیں آئے ؟” 

اب کی بار میں انکار نہیں کر سکا اور میں نے کہا کہ میں چند دوستوں کے ساتھ ضرور آؤں گا ۔

جب ہم وہاں پہنچے تو انہوں نے ہمیں  پینے کو پانی دیا اور ہماری آمد کاشکریہ ادا کیا۔ پھر انہوں  نے ہمیں کاغذ اور قلم دیئے اور کہا ،” آج ہم کلام کا مطالعہ کریں گے۔ میں سب کے لئے چائے بنانے جا رہا ہوں اس دوران آپ سب لوگ متی کے باب نمبر 28 کی آیت نمبر 16 سے ،20 بائبل سے اپنے اپنے کاغذ پر نقل کریں ۔اِس کے بعد اُس کے آگے لکھیں کہ آپ ان چیزوں کا اطلاق اپنی زندگیوں پر کیسے کریں گے” ۔

میں  سوچنے لگا،” یہ کس قسم کی تربیت ہے ؟ ہمیں بس اُس نے ایک   ورق اور ایک قلم تھمادیا ہے !”۔ میں اس سے پہلے ہی بائبل کالج میں تربیت حاصل کر چکا تھا ۔میں نے خدمت کے 12 سال کامیابی سے پورے کئے تھے ۔لیکن اگلے 10 منٹ میں مَیں بالکل تبدیل ہو کر رہ گیا ۔ 

میں نے متی کے باب نمبر 28 میں پڑھا کہ یسوع کہتا ہے کہ ہمیں جا کر تمام قوموں میں شاگردبنانے ہیں۔ میں نے یہ لکھ لیا۔ بعد میں جب میں نے انہیں اپنی لکھی  ہوئی چیزوں کے بارے میں  بتایا، تو واکر بھائی نے مجھ سے پوچھا ،” سنجے تمہاری منسٹری بہت بڑی ہے لیکن کیا تمہارے پاس کوئی شاگرد بھی ہیں ؟” 

 میں  نے سوچا ،”  میرے پاس تو ایک بھی شاگرد نہیں ہے۔ 10 سالوں میں  مَیں نے یسوع کے  لئے کچھ بھی نہیں کیا۔  اُس  نے شاگرد بنانے کو کہا تھا لیکن آج تک مَیں کچھ بھی نہیں کر سکا “۔

اگلے ماہ میں دوبارہ واکر کے خاندان سے ملنے آیا ۔ہم مل کر بیٹھے اور خُدا کے کلام کا مطالعہ کیا۔ اُس کے بعد سے مَیں نے فیصلہ کر لیا کہ مجھے کچھ چیزیں پیچھے چھوڑنا پڑیں گی۔ مَیں صرف ایک خواہش لئے واپس گھر آیا کہ مجھے شاگرد بنانے ہیں ۔جس سکول کی میں نے ابتدا کی تھی ، میں نے اُس سے استعفیٰ دے دیا۔  اس کے علاوہ میں  نے ایک عالمی منسٹری کا اچھی تنخواہ والا عہدہ  اور بائبل کے  تربیتی  مرکز کےصدر کی حثییت سے بھی اپنا عہدہ چھوڑ دیا ۔ میں نے سب کچھ چھوڑ دیا۔ تب سے اب تک میری پوری توجہ کسی اور چیز کی بجائے یسوع کے حکم کی تعمیل پر رہی ہے اور خُدا نے میری ہر ضرورت ہر طرح سے پوری کی ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہم ایک مہینے میں کم و بیش ایک مرتبہ سنجے اور اُس کے 15 دوستوں سے ملاقاتیں کرنے لگے، جنہیں  اُس نے اپنے صوبے کے مختلف ضلعوں سے دعوت دی تھی۔ اُن میں سے زیادہ تر مسیحی پس منظر اور کچھ ہندو پس منظر سے تعلق رکھنے والے ایماندار تھے ۔اُن میں سے جنہوں  نے CPM کے اصولوں کا  اطلاق شروع کیا ،انہیں جلد ہی پھل آتا نظر آنے لگا ۔سنجے اس گروپ کا ہیڈ کوچ تھا جو اُن کی ہمت بندھاتا رہتا تھا ۔

• دسمبر 2012 تک 55  دریافتی بائبل گروپ شروع ہو چکے تھے جو سب کے سب کھوئے ہوئے لوگوں پر   مشتمل تھے ۔
• دسمبر 2013 تک یہ 250 گروپوں تک پہنچ چکے تھے ( چرچز اور دریافتی گروپ ) ۔
• دسمبر 2014 تک 700 چرچ قائم ہو چکے تھے اور تقریبا 2500 بپتسمے دیئے جا چکے تھے ۔
• دسمبر 2015 تک 2000 چرچز قائم ہوئے اور تقریبا 9000 بپتسمے دیئے گئے ۔ 
• دسمبر 2016 میں چرچز کی تعداد 6500 تھی اور بپتسموں کی تعداد تقریبا 25000 تھی ۔
• دسمبر 2017 میں چرچز 21000 تک بڑھ چکے تھے اور بپتسموں کی تعداد کا شمار رکھنا ممکن نہیں رہا تھا ۔
• دسمبر 2018 میں چرچز کی تعداد 30000 ہو چکی تھی ۔

حصہ دوم میں ہم آپ کو  اِس   عمل کے دوران ہمارے سیکھے ہوئے اسباق،  ہمارے ساتھ شامِل بہت سے لوگوں کے کرداروں  اور ترقی  کے ضامن کلیدی عناصر سے آگاہ کریں گے۔ 

میں اور میری اہلیہ “کاری” ، سال 2000 سے جنوبی ایشیا میں مقیم ہیں اور خدمت کر رہے ہیں۔ ہمیں کئی نارسا قوموں میں خُدا کی بادشاہی کےاظہار اور چرچز کی افزائش دیکھنے کا اعزازحاصل ہے ۔آپ جانتے ہیں کہ ایمسٹرڈیم  میں سال 2000 کے بعد ہم فینشنگ دی ٹاسک کی کاوشوں  کی وجہ سے ملنے والی 20 سالہ کامیابیوں کا جشن منانے اکٹھے ہوئے ہیں۔ مختلف مشنری تنظیموں، مختلف چرچزاور فرقوں کے پس منظر رکھنے والے سینکڑوں راہنما AD2000  تحریک  اور لوسین کانگریس کے لائے ہوئے پھل کا جشن منانے ایمسٹر ڈیم میں جمع ہوئے تھے۔ لیکن اُنہوں نے اس بات پر بھی غور  کیا کہ ارشادِاعظم کے 2000 سال گزر جانے کے بعد ہم اُس ارشاد کی تعمیل میں کس حد تک کامیاب ہوئے ہیں ۔

اُسی میٹنگ میں سب نے اس حقیقت سے بھی اتفاق کیا کہ دنیا کی ہزاروں قومیں ابھی تک انجیل کی خوشخبری سے دورہیں ۔ یقینا یہ بات  ناقابلِ قبول تھی۔ وہاں ہی ایک مقصد نے جنم لیا کہ ہم اپنی ہی نسل میں، ہر قوم، قبیلے اور اہلِ زبان کو خُدا کا پیغام پہنچا کر اُس کےتخت کے  سامنے پیش کریں۔  مجھے اور میری اہلیہ کو جنوبی ایشیا میں چرچز کی افزائش ہوتے دیکھنے کا موقع ملا ہے ۔ ہم اس بات سے بھی واقف ہیں   کہ کئی قومیں ابھی تک نا صرف نارسا ہیں،بلکہ اُن میں  کوئی سر گرمی بھی شروع نہیں کی گئی۔ اُن میں سے چند ایسی بھی ہیں جو ہمارے آس پاس کے علاقوں میں رہتی ہیں ۔

 ایمسٹرڈیم 2000 کے بعد دو دہائیاں گزر چکی ہیں۔ فینشنگ دی ٹاسک(FTT) ارشادِ اعظم کی تاریخ میں پہلی مرتبہ 2500 قوموں کو سر گرم کرنے کا محرک بنی ہے۔ میں چاہتا ہوں کہ آپ میرے ساتھ مل کر اس پر غور کریں۔ ارشادِ اعظم کی تاریخ کے 2000سالہ تناظر  میں  دودہائیوں پر نظرڈالیں۔ اگر میرا حساب درست ہے تو یہ ارشاداعظم کی تاریخ کا صرف ایکفی صدحصہ ہے۔ سال 2000 سے اب تک کی دو دہائیوں میں FTT  کی تحریک صرف ایک فیصد کوششوں کا اظہار کرتی ہے ( ارشاد اعظم کی تاریخ کے 2000 سالوں میں سے صرف 20 سال )۔ آج ہم 20 سالوں پر محیط FTT  جیسی کوششوں کے پھل کا جشن منا رہے ہیں : اوسط سو سے زیادہ  نارسا قومیں بابل کے برج کے وقت کے بعد سے خوشخبری سُن رہی ہیں۔ انہیں مسیح کو جاننے کا موقع ملا ہے ،جس نے اُن کے گناہوں کی خاطر اپنی جان قربان کی ۔

ہمارے پاس خوشیاں منانے کی کئی وجوہات ہیں۔ ہم کایروس کی نسل میں جی رہے ہیں ۔ جس میں کلام نے پہلی مرتبہ ارشاد اعظم کی تاریخ کے ایک فیصد دورانیے میں دنیا کی 20 فیصد آبادی تک رسائی حاصل کر لی ۔ہمیں اکثر یہ سِکھایا جاتا ہے کہ  رسائی اور سر گرمی کی ابتدا کسی دوڑ کے آغاز کی طرح ہوتی ہے ۔لیکن ہم یہ سمجھتے ہیں کہ ہمیں اس دوڑ کے پورا ہونے کو یقینی بنانا ہے اور ہم اسی بارے میں بات کرنے کے لئے آج یہاں موجود ہیں ۔

اس سیشن کا بنیادی مقصد کلام سے ان سوالوں کے جوابات  حاصل کرنا ہے :” اس معاملے میں سب سے ذیادہ پیچیدہ اور نازک عناصر کیا ہیں ؟ رسائی شروع ہونے کے بعد دوڑ کے وہ چکر جو ہمیں مکمل کرنے ہیں کون سے ہیں ؟” ہمارا مقصد صرف یہی نہیں ہے کہ پوری دنیا کی  تمام علاقائی تہذیبوں  میں چرچز قائم ہو ں اور خُدا کی بادشاہی کا مقامی طور پر اظہار ہو ۔ ہم یہ بھی چاہتے ہیں کہ یہ چرچز تعداد میں بڑھیں ،اس ذمہ داری کو قبول کریں اور  ہر قوم اور ہم ہر مقام پر ارشاد اعظم کی تکمیل کی کوششوں کی ذمہ داری قبول کریں ۔ ہم چاہتے ہیں کہ چرچز مزید چرچز کو جنم دیں اور پھر چرچز کی نسلیں  ، نسل در نسل بڑھتی جائیں ۔ اس کے نتیجے میں ہر قوم اور قبیلے ، علاقے اور زبان سے خُدا کے تخت کے اردگرد لوگوں کی بڑی بھیڑ نظر آئے ۔ہمیں ایک بہت بڑا کام در پیش ہے : کرہ ِزمین کی تمام قومیں !اگرچہ ہم کایروس کی نسل میں ہیں جس میں پہلی مرتبہ اتنے ذیادہ لوگ سر گرم ہو چکے ہیں، لیکن اگر ہم یہ سوچنے لگیں کہ ہمارے منصوبے حکمت عملی اور قابلیتیں اس مقصد کے لئے کافی ہیں ، تو ہم غلط ہوں گے ۔ہم میں سے کوئی بھی نہ ہی اکیلے یہ کر سکتا ہے اور نہ ہی یہ فرض کر سکتا ہےکہ ہماری قابلیتیں ہمارے مقاصد حتی ٰکہ ہمارے منصوبے اور حکمت عملیاں بھی اس مقصد کوپورا کرنے کے لئے کافی ہیں ۔اس کا مطلب یہ ہوا کہ ہم کچھ بھی نہیں کر سکتے۔ خُدا کی تمجید ہو ، اگرچہ ہم کچھ نہیں کر سکتے لیکن ہم اُس کا کلام اُٹھا کر پوچھ سکتے ہیں:” کہ جو دوڑ ہم نے شروع کی ہے ہم اُسے کیسے مکمل کریں ” ۔

کیا آپ  میرے ساتھ بائبل سٹڈی میں شامل ہونا پسند کریں گے ؟ جب ہم پورے خلوص کے ساتھ 100 فیصد نئے عہد نامے کے عقائد سے جُڑے رہتے ہیں  تو اس کے لئے اکثر “آرتھوڈاکس یا قدامت پرست ” کی اصطلاح استعمال کی جاتی ہے ۔ اس کا مطلب یہ ہوا کہ ہم اپنے عقائد خُدا کے کلام سے براہ راست اخذ کرتے ہیں جو کہ نئے عہد نامے کی تعلیمات کی ابتدا میں ہیں ۔ اسی طرح ہم اپنے مشن کو بھی اسی اصول پر استوار کرتے ہیں، خاص طور پر جب ہمیں بہت سی نئی قوموں  اور نئے علاقوں میں پہلی مرتبہ تہذیبی رکاوٹیں عبور کرکے جانے کی ضرورت ہو۔ہمارے لئے بہترین  طریقہ یہی ہے کہ ہم نئے عہد نامے سے رجوع کریں ۔اور جب ہم اس مقصد کے لئے مل کر بیٹھتے ہیں  تو میں چاہوں گا کہ آپ بائبل میں اعمال کی کتاب کھولیں ۔  

جب آپ اعمال کی کتاب کا 13   واں باب کھولیں اور ہم اسے مل کر پڑھیں تو ہم جان جاتے ہیں کہ اعمال کی پوری کتاب میں لوقا چرچ کے پھیلاؤ کا جتنا بھی ذکر کرتا ہے وہ اعمال کے باب نمبر 1 کی آیت نمبر 8 میں دیئے گے خاکے پر مبنی ہے ۔جس روز ہمارا منجی آسمان پر چلا گیا ، اُس نے اپنے پیروکاروں سے کہا کہ وہ یروشلیم میں ٹھہرے رہیں اور روح القدس کا انتظار کریں ،جس کا وعدہ کیا گیا تھا ۔کیو نکہ اُس نے کہا کہ جب وہ نازل ہو گا تو، ” تم قوت پاؤ گے اور یروشلیم اور تمام یہودیہ اور سامریہ میں بلکہ زمین کی انتہا تک میرے گواہ ہو گے “

اعمال کی کتاب کے پہلے نصف حصے میں ہم فلپس اور پطرس جیسے منادوں کو یروشلیم اور پھر یہودیہ اور سامریہ کے علاقوں میں منادی کرتا دیکھتے ہیں۔ پھر جب ہم اعمال کے      13ویں  باب تک پہنچتے ہیں تو ہم دیکھتے ہیں کہ برنباس اور ساؤل کو انطاکیہ کی کلیسیا میں بھیجا جاتا ہے۔ یہ وہ  مرحلہ ہے جہاں  کلام کو دنیا کی انتہاؤں تک بھیجنے کا آغاز ہوتا ہے۔ میرے ساتھ مل کر اعمال کا13  واں باب پڑھیے ۔ میں پہلی آیت سے آغاز کروں گا ۔” انطاکیہ میں اُس کلیسیا کے متعلق جو وہاں تھی کئی نبی اور معلم تھے ” اور اُس کے بعد پانچ ناموں کی فہرست دی گئی ہے۔  دوسری آیت کہتی ہے ” جب وہ خُداوند کی عبادت کر رہے اور روزے رکھ رہے تھے تو روح القدس نے کہا کہ میرے لئے برنباس اور ساؤل کو اُس کام کے واسطے مخصوص کر دو جس کے واسطے میں نے اُن کو بُلایا ہے۔ تب اُنہوں نے روزہ رکھ کر اور دعا کر کے اور اُن پر ہاتھ رکھ کر انہیں رخصت کیا ” ۔اس واقعہ کو عام طور پر پولوس کی منادی کے پہلے سفر کی ابتدا کہا جاتا ہے ۔یقینا ہم دیکھتے ہیں کہ وہ صرف پولوس نہیں تھا بلکہ برنباس اور ساؤل تھے،  جو کہ اُس وقت تک پولوس کا نام تھا۔ اُن کا چناؤ اور اس مقصد کے لئے علیحدہ کیا جانا روح القدس کی بلاہٹ پر تھا۔

ہمارے ان آیات کے انتخاب اور انہیں خادموں منادوں اور رسولوں کو بھیجنے کی بنیاد بنانے کی بہت سی وجوہات ہیں۔ پہلی وجہ یہ ہے کہ لوقا ان آیات میں پہلی مرتبہ ارادی طور پر رسولوں کے بھیجنے کا واقعہ بیان کرتا ہے۔ اس کی ابتدا انطاکیہ کے چرچ سے ہوئی ۔ پھر ایمان دار اور کلیسیا  کے راہنما اکٹھے ہوکر دعا اور روزے میں مشغول ہو گئے، جو کہ فرمانبرداری کا اظہار ہے ۔اس طرح وہ روح القدس کی آواز سُن کر رسولوں کو منادی کے لئے بھیجنے کے قابل ہو گئے ۔ ان آیات کہ اہمیت کی ایک اوربڑی وجہ یہ حقیقت بھی ہے کہ یہ بائبل کی اُن چند آیات میں سے ہیں جہاں تثلیث کی تیسری شخصیت یعنی روح القدس کا ذکر ہے۔ یہی وہ روح تھا جو پیدائش  کے پہلے باب میں پانیوں کے اوپر تیرتا تھا ،جب خُدا نے کہا ” روشنی ہو جا “۔ یہی روح تھا جس نے پطرس کے پہلے خط کے مطابق پرانے عہد نامے کے پیغمبروں کو منتخب کیا اور اُن کی راہنمائی کی۔ اُن پیغمبروں نے ہمیں خُدا کے کلام کے ذریعے راستبازی کی راہ دِکھائی۔ یہ روح القدس عموما خاموش رہتا ہے اور اُس کے کہے گئے الفاظ بائبل میں بہت کم جگہوں پر لکھے نظر آتے ہیں ۔

یہ آیات اس لئے بھی خاص ہیں کہ کلام میں پہلی مرتبہ،                                      پنتیکوست  کے بعد ، خُدا کا روح بول رہا ہے اور کلیسیا کو ہدایات دے رہا ہے۔ ہدایات کیا ہیں ؟” میرے لئے برنباس اور ساؤل کو اُس کام کے واسطے مخصوص کر دو جس کے واسطے میں نے ان کو بُلایا ہے ” ۔لوقا کلام کے اس حصے میں روح القدس کے الفاظ بیان کرتا ہے۔ ہم جان جاتے ہیں کہ روح القدس نے اپنے اختیار کے ذریعے اس مشن کی ابتدا کی اور اس مشنری  سفر کے ہر قدم پر وہ ہدایت اور راہنمائی دیتا رہے گا ۔ لیکن ہم اعمال کے 14  ویں باب میں ان آیات کا انجامِ کار بھی دیکھتے ہیں۔ کیا آپ میرے ساتھ مل کر بائبل کا اگلا صفحہ اُلٹیں گے ؟

اعمال کے 14  ویں باب کی 26  ویں آیت میں لوقا ایک بار پھر روح القدس کے شروع کئے گے اس کام کا ذکر کرتا ہے۔ اعمال 14:26 کہتی ہے ،” اور اطالیہ سے بربناس اور ساؤل، جِسے اب پولوس کہا جاتا تھا  ،جہاز پر اُس انطاکیہ میں آئے جہاں اُس کام کے لئے جو انہوں نے اب پورا کیا خُدا کے فضل کے سپُرد کئے گئے تھے “،یہاں لوقا، بین السطور کی ایک ادبی  اصطلاح استعمال کرتا ہے۔ اعمال 13:2 میں روح القدس برنباس اور ساؤل کو اُس کام کے لئے علیحدہ کرنے کا کہتا ہے ،جس کے لئے اُس نے انہیں بُلایا اور اعمال 23   : 14  میں لوقا بین السطوراُ س کام کی  انجام دہی کا ذکر کرتا ہے۔ وہ وہاں واپس پہنچے جہاں خُدا نے انہیں اپنے فضل سے اُس کام کی ذمہ داری بخشی تھی اور جو اب وہ مکمل کر چکے تھے ۔ دراصل لوقا چاہتا ہے کہ پہلے مشنری سفر کے تناظر میں ہم ان دونوں بابوں کو ملا کر ایک ساتھ پڑھیں۔

اگر ہمیں مشنری بن کر زمین کی انتہاؤں تک قوموں میں سر گرم ہونا ہے ، اور اگر ہم اس مقصد کے ساتھ مخلص ہیں تو ضروری ہے کہ ہم اعمال کی کتاب کا جائزہ لیں اور خود کو اُسی منظر نامے میں رکھیں جو اعمال کی کتاب میں ہے۔ یہ وہ منظر نامہ ہے   جو کہ مشن کے لئے ماحول تخلیق کرتا ہے۔ پھر اگر ہم خُدا کی دی ہوئی ذمہ داری پوری کرتے ہوئے اس کام کو  انجام تک پہنچانا ہے تو یہی مناسب ہے کہ ہم ان آیات سے رجوع کریں اوربس  یہ سوال پوچھیں ،” پولوس اور برنباس نے کس کام کے کرنے کی ذمہ داری اُٹھائی ؟” دوسری بات یہ کہ  ،” اُن کے کام کو مکمل اور پوری طرح سے انجام دیا گیا کس بنا پر کہا جا سکتا ہے ؟” یقینا اُنہوں نے وہ کام پوری دیانت داری اور خلوص کے ساتھ مکمل  کیا ۔

اب یہ آیات ہم میں سے کسی کے لئے بھی نئی نہیں ہیں۔ ہم میں سے کچھ لوگوں نے پہلے مشنری سفر کے بارے میں ان آیات کو سینکڑوں مرتبہ پڑھا ہو گا۔جب ہم برنباس اور ساؤل ( جسے بعد میں پولوس کہا گیا ) کے کام پر نظر ڈالتے ہیں تو ہمیں یہ بات دلچسپی کی حامل نظر آتی ہے کہ اُن کے اس کام کی ابتدا روح القدس نے کی اور اُسی نے انہیں اختیار اور ہدایات دیں ۔ ہم اعمال 14: 14 میں ان دو رسولوں کو مشن پر جاتے ہوئے دیکھتے ہیں نارسا صوبوں اور شہروں میں پہنچنے والے یہ اولین لوگ تھے ان اولین لوگوں کو منادی کے دوران نہ صرف لسترہ میں ایک اجنبی زبان کی رکاوٹ کا سامنا تھا بلکہ طرح طرح کے بت پرستوں سے بھی نمٹنا تھا ۔کئی مقامات پر مثلاً پسدیہ کے انطاکیہ میں یہودی عبادت خانے میں اور کُپرس کے پورے جزیرے میں اور پافس میں ہم اُنہیں اُس بلاہٹ کا جواب دیتے ہوئے دیکھتے ہیں جو روح القدس کی طرف سے تھی ۔ ہم سر گیُس پولوس  صوبہ دار  کو خُدا کا کلام سُن کر ایمان لاتے ہوئے دیکھتے ہیں ۔ پھر اُس کے بعد انہیں پسدیہ کے انطاکیہ، اکُنیم ،لُسترہ اور دربے میں مزید بہت سے چیلنجز کا سامنا کرتے ہوئے دیکھتے ہیں ۔

ان قوموں اور علاقوں میں منادی کے دوران ہم بار بار اُن کے منہ سے یہ ہی الفاظ سُنتے جاتے ہیں “خُدا کا کلام ” ،”خُدا کا کلام ” ” خُدا کا کلام ” دراصل اعمال کے دو ابواب میں ہمیں نو مرتبہ یہ لکھا نظر آتا ہے کہ بھیجے ہوئے مشنریوں نے خُدا کا کلام سُنای۔ا خوشخبری کی گواہی کا بیج بوتے ہوئے وہ پوری طرح مخلص تھے۔ اعمال کے 13  ویں باب میں لوقا پسدیہ کے انطاکیہ کے وعظ پر 25 آیات لکھتا ہے۔ جب پولوس اور برنباس کلام کی منادی کرنے کو نکلے تو ہر جگہ اُس خوشخبری کو قبول نہیں کیا گیا ۔درحقیقت ہم       13  ویں  باب کی 46   ویں آیت میں دیکھتے ہیں کہ پسدیہ کے انطاکیہ میں یہودی عبادت خانے میں موجود  بہت سے یہودی کلام سُن کر حسد سے بھر گئے۔ آیت نمبر46 کہتی ہے ،” پولوس اور برنباس دلیر ہو کر کہنے لگے کہ ضرور تھا کہ خُدا کا کلام پہلے تمہیں سُنا یا جائے ،لیکن چو نکہ تم اُس کو  رد کرتے ہو اور اپنے آپ کو ہمیشہ کی زندگی کے ناقابل ٹھہراتے ہو تو دیکھو ہم غیر قوموں کی طرف متوجہ ہوتے ہیں “۔                    یسعیاہ نبی کا حوالہ دیتے ہوئے پولوس کہتا ہے ،” میں نے تجھے غیر قوموں کے لئے نوُر مقرر کیا تاکہ تو زمین کی انتہا تک نجات کا باعث ہو ”  آیت نمبر 48 ”  غیر قوم والے یہ سُن کر خوش ہوئے اور خُدا کے کلام کی بڑائی کرنے لگے اور جتنے ہمیشہ کی زندگی کے لئے مقرر کئے گئے تھے ایمان لے آئے ”   آیت نمبر 49 ، ” اور اُس تمام علاقہ میں خُدا کا کلام   پھیل گیا ” 

سو یہاں  پسدیہ کے انطاکیہ میں ہم صرف اولین مشنریوں کو قوموں میں خُدا کے کلام کی منادی کرتے نہیں دیکھتے ۔ہم یہ بھی دیکھتے ہیں کہ اُن قوموں  میں  جتنے ہمیشہ کی زندگی کے لئے مقرر کئے گئے تھے  وہ فورا ایمان لے آئے ،اور اُس کے بعد ہم دیکھتے ہیں کہ وہ پورے علاقے میں پھیل گئے اور کلام کا بیج بونے کے کام میں شامل ہوگئے ۔یہ ایک بہت اہم تبدیلی  ہے ۔ پہلے مشنری سفر میں باب نمبر 13 کے اختتام سے پہلے 52   ویں آیت میں ہم ” شاگرد” کا لفظ دیکھتے ہیں۔ وہاں پسدیہ کے انطاکیہ  میں خوشی اور روح القدس سے معمور ہوتے رہے جہاں جہاں کلام کی منادی ہوئی ،جہاں جہاں بیج بویا گیا وہاں وہاں ہم کھیت میں نئی زندگی کا ظہور شاگردوں کی صورت میں  ہوتے ہوئے دیکھتے ہیں۔   باب نمبر 13 میں اس سفر کے اختتام سے پہلے شاگرد کا لفظ مزید تین مرتبہ سامنے آتا ہے۔ گلتیہ کے شہروں اکنیم ،لُسترہ اور دربے میں نئے ایماندار پولوس کے ساتھ رہے، یہاں تک کہ لسترہ میں جب اُسے سنگسار کرکے  موت کے دہانے پر پہنچا دیا گیا اور اُس کے جسم کو کھینچ کر شہر سے باہر لے جایا گیا، تب بھی نئے ایمان دار اُس کے ارد گرد اکٹھے تھے۔  نئے ایماندار جمع ہوئے اور جب اُنہوں نے دعا کی تو پولوس اُٹھ کھڑا ہوا اور شہر میں واپس چلا گیا ۔ دربے لسترہ اور اکُنیم کے شاگردوں کو پولوس اور برنباس نے کہا ،” ضرور ہے کہ ہم بہت مصیبتیں سہہ کر خُدا کی بادشاہی میں داخل  ہوں “پولوس اور برنباس  نہ صرف اولین مشنری بنے ، نہ صرف انہوں نے خوشخبری کا پیغام  پھیلایا بلکہ انہوں نے اُن شہروں میں سے ہر ایک میں نئے شاگردوں کی نگہداشت اور نشوونما بھی کی ۔ یہاں تک کہ وہ اُن شہروں میں بھی واپس گئے جہاں اُنہیں ایذارسانی کا سامنا کرنا پڑا تھا ۔ ( پولوس کو تو سنگسار کرکے مردہ سمجھ لیا گیا تھا لیکن اُس نے یہ سب کچھ نئے ایمانداروں کی نشوونما اور ایمان میں ترقی کی خاطر برداشت کیا) ۔

اگر آپ کی بائبل کھُلی ہے تو اعمال  14:23پر نظر ڈالیں ۔واپسی کے سفر میں وہ اُن شہروں میں واپس گئے جہاں انہوں  نے خُدا کے کلام کا بیج بویا تھا اور جہاں شاگرد بنے تھے۔ ہم دیکھتے ہیں کہ انہوں نے کلیسیا میں اُن کے لئے بزرگوں کو مقرر کیا ۔ اس سے یہ بات واضح ہو جاتی ہے کہ انہیں مقامی پاسبانوں اور نئے گلے کے لئے راہنماؤں کے تقرر کی بہت فکر تھی اس مشنری ذمہ داری اور پہلے سفر کو لوقا ” کام ”    کا نام دیتا ہے ۔ اس کام کے بہت سے پہلو ہیں ہمارے لئے اس کام کے تکمیل کرنے کے لئے ضروری ہے کہ ہم اولین بنیں ۔یہ کام سرگرمی کا آغاز کرنے سے شروع ہوتا ہے لیکن یاد رکھیے کہ سرگرمی شروع کر لینا محض دوڑ کا آغاز ہے ۔ ہمیں دوڑ کے سارے چکر پورے کرنے کی بھی ضرورت ہے۔ جب ہم خالی کھیتوں میں جاتے ہیں تو ہمارا مقصد کلام کا بیج بونا  ہوتا  ہے ۔ جب کلام کا بیج بو دیا جاتا ہے تو یہ قدرتی سی بات ہے کہ روح القدس کی شراکت ہونے کے باوجود شاگرد سازی کی صورت میں نئے حاصل ہونے والے ایمانداروں کی نگہداشت اور نشوونما  کی جائے۔ اسی طرح کھیتی بڑھتی اور کاٹنے کے قابل ہوتی ہے ،تاکہ چرچز کا قیام عمل میں  آ سکے ۔ 

نئے راہنما نہ صرف مقامی گلہ کی پاسبانی کرنے کے لئے ابھرتے ہیں بلکہ ( جیسا کہ ہم اعمال 1 : 16 میں لسترہ کی کلیسیا میں تیمتھیس کو ابھرتا دیکھتے ہیں) وہ اگلے خالی کھیت میں کلام کا بیج بونے والوں کے ساتھ بھی شامل ہو سکتے ہیں۔ کیا آپ کو یہاں ایک نمونہ نظر آتا ہے ؟ کیا آپ اعمال کی کتاب میں مشن کے کام کا مقصد سمجھ سکتے ہیں ؟ یہ کام صرف پہلے سفر تک محدود نہیں ۔جو کچھ پہلے سفر میں ہوتا ہے وہ  دوسرے اور تیسرے سفر میں دوہرایا جاتا ہے۔ جب پولوس اور برنباس ( اور بعد میں پولوس، سیلاس اور تیمتھیس ) مقدونیہ کی بلاہٹ پر وہاں چلے تو اُن لوگوں نے پیچھے رہ جانے والی کلیسیا کی نگہبانی سنبھال لی ۔ یہی نمونہ ہمیں کرنتھیوں اور آسیہ کے صوبے میں افسس کی کلیسیا میں بھی نظر آتا ہے ۔

یہاں ہمیں ہر جگہ ،کلام کی منادی ، شاگرد سازی اور نئی کلیسیاؤں کو جنم دینے والی کلیسیاؤں میں افزائش کا عنصر نظر آتا ہے ۔ہم دیکھتے ہیں کہ نئی کھیتی میں سے ہی وہ لوگ ابھرتے ہیں جو مزید فصل تیار کرتے ہیں۔ میرا خیال ہے کہ اس نمونے کا ہر پہلو اپنی جگہ بہت اہم ہے ۔               جہاں ہم ابتدا کئے ہوئے کام کو مکمل کرتے ہیں تو وہاں ہم دوڑ  دوڑتے نظر آتے ہیں۔ ہر نئی جگہ پر کلام کا بیج بوتے ہوئے ،شاگرد بناتے ہوئے ، چرچ قائم کرتے ہوئے اور راہنماؤں کا تقرر کرتے ہوئے ہم اسی عمل کو دوہراتے چلے جاتے ہیں ۔

آیئے اپنی زندگیوں اور اپنے دنوں کو بہترین انداز میں گزاریں  جیسا کہ زبور نمبر 90 میں ہے کہ ہم خُدا سے دعا کریں کہ وہ ہم کو اپنے دن گننا سِکھائے ،تاکہ ہم وہ ذمہ داری پوری کریں جو ہمیں دی گئی ہے :کا م ،کام اور کام ۔ ہماری سب سے پہلی ترجیح یہی  ہونی چاہیے کہ ہم اُس کام کو پورا ہوتے اور خُداوند کو واپس آتا دیکھیں۔ جیسا کہ متی کے باب نمبر 25 میں ہے کہ جب وہ آئے اور ہمیں اپنا کا م کرتے دیکھے  تو کہے ” شاباش اچھے اور مخلص خادم ”  ۔اُس کام کو یاد رکھیں جس کی تکمیل کے لئے وہ ہمیں بُلا رہا ہے – اپنے چرچز ، اپنی تنظیموں اور اداروں میں  ایمانداروں  کو متحرک کرنا۔ ہو سکتا ہے کہ آپ پوچھیں کہ میں کلام کسے سُناؤں ؟ میں کلام کی منادی میں کسے اپنے ساتھ شریک کروں ؟   FTT  آپ کے ان سوالوں کا جواب دینے کے لئے تیار ہے۔  جب آپ اپنے لئے کوئی ہدف مقرر کرتے ہیں ،جب آپ کو  قوموں کی طرف جانے کی بلاہٹ ہوتی ہے یا آپ زمین کی انتہاؤں تک جانا چاہتے ہیں تو ایک اور سوال ابھرتا ہے ،” میں کیا کہوں ؟ میں اُن لوگوں کےدرمیان  کلام کی سچائی کو کیسے قائم رکھوں جنہوں نے ابھی تک سُنا نہیں ہے ؟ ”  پھر ایک تیسرا سوال ہے ،” اگر وہ ہاں کہہ دیں تو میں کیا کروں ؟ میں شاگرد کیسے بناؤں ؟” اگر آپ کے شاگردوں کے دلوں اور  ذہنوں میں ان سوالوں کے جوابات واضح ہوں تو انہیں متحرک کر کے نئے شاگرد بنانے کے لئے   بھیجا جا سکتا ہے۔ ایک چوتھا سوال ،” ہم چرچ کیسے قائم کر یں گے ؟ ہماری ذاتی پسند یا نا پسند ، ہمارے تہذیبی تناظر  اور فرقے کی روایات سے ہٹ کر خُدا کا کلام مسیح کی دُلہن کے بارے میں کیا کہتا ہے ؟ ہم انہیں مسیح کا بدن کیسے بنائیں ؟ ” اگر آپ اس سوال کا جواب خُدا کے کلام میں تلاش کر لیں تو آپ کے شاگرد چرچز کا قیام کرنے والے اولین لوگ بن سکتے ہیں ۔اور آخر میں ، ” ہم ایسے راہنما ؤں کی افزائش کس طرح کریں جو یہ ہی سب کچھ باربار کر سکیں -نئی جگہوں پر جا کر پوری سچائی کے ساتھ کلام کا بیج بونا ، کلام قبول کرنے والےلوگوں کو شاگرد بنانا ،  اُس فصل سے حاصل ہونے والے لوگوں کو چرچ کی شکل دینا اور پھر ایسے راہنماؤں کی تلاش اور تقرر کرنا جو بار بار یہ عمل دوہرا سکتے ہیں ۔ ہر قوم قبیلے امت اور زبان تک پہنچنے کے لئے یہ بڑا پیچیدہ راستہ ہے ۔

مکاشفہ کے 7  ویں باب میں جس بے شمار بھیڑ کا ذکر ہے اُسے حاصل کرنے کے لئے ضرورت ہے کہ ہم افزائش در افزائش کریں ۔کیا آپ اپنے شاگردوں کو یہی کا م حوالے کرنے کے لئے تیار ہیں ؟ کیا آپ تیار ہیں کہ انہیں قوموں کے درمیان بھیجیں – دنیا کی انتہاؤں تک ؟ اور شاید اس سے پہلے پوچھا گیا سوال دوبارہ سامنے آئے – کیا آپ خُدا کے روح کی آواز سُن سکتے ہیں جو آپ کو بُلا رہا ہے اور فصل کے لئے مزدور بھیجنے کو کہہ رہا ہے ؟ 

کام کی تکمیل کے لئے ضروری ہے کہ مشن کا آغاز کیا جائے اور مشنریوں کو بھیجا جائے۔ رومیوں  باب نمبر 10 کے مطابق جس پر وہ ایمان نہیں لائے اُس سے کیوں کر دعا کریں ؟ اور جس کا ذکر انہوں نے سُنا نہیں اُس پر ایمان کیوں کر لائیں ؟ اور بغیر منادی کرنے والے کے کیوں کر سُنیں ؟ ہر جگہ خُدا کی بادشاہی کی جانب پہلا قدم مزدوروں کے بھیجنے کا قدم ہے اور ہم کایروس کی نسل کے درمیان زندہ ہیں ۔

ایک سو سال پہلے جے او فریزر نامی ایک مشنری ،جنہیں میں مشنری ہیرو مانتا ہوں ، جنوب مغربی چین میں لیسو نامی قوم  کے درمیان خدمت کر رہے تھے اپنے مشنری کام کے بارےمیں انہوں نے کہا :

مشن کے میدان میں کسی شخص کا جانا ایسا ہے جیسے کوئی اپنے ہاتھ میں جلتی ہوئی تیلی لئے ایک نم اور تاریک وادی میں پہنچے جہاں وہ کسی بھی جل سکنے والی چیز کو آگ لگا نا چاہتا ہو لیکن وہاں ہر گیلی ہو ۔ اور جتنی بھی کوشش کر لے وہ کسی چیز کو جلا نہیں سکتا دوسری صورت حال ایسی ہو سکتی ہے کہ خُدا نےہوا اور دھوپ کے ذریعے پہلے سے ہی وادی کو خشک کر رکھا ہو ۔ اور جس چیز کو بھی وہ آگ لگائے ،چاہے وہ جھاڑی ، درخت ، چند ٹہنیاں  یا پتوں کا ڈھیر ہو جلنے لگیں اور جلانے والے کے چلےجانے کے بعد بھی دیر تک روشنی اور حرارت دیتے رہیں ۔ خُدا ہم سے یہی چاہتا ہے: پوری دنیا میں جگہ جگہ جلتی ہوئی چھوٹی چھوٹی آگ ۔

فینشنگ دی ٹاسک کی کوششوں کا شکریہ کیونکہ اُن کی وجہ سے ہماری نسل کی دو دہائیوں میں دنیا میں کئی جگہ  ہزاروں مقامات پر حقیقتاً ایسی آگ جل رہی ہے ۔ ارشاداعظم کی تاریخ کے آخری ایک فیصد دورانیے میں دنیا کے 20 فیصد لوگ اور قومیں سرگرم ہو چکے ہیں ۔ اگر سر گرمی کی ابتدا دوڑ کے آغاز کی طرح ہے تو دوڑ کے چکر ابھی باقی ہیں۔ یہ چکر ہیں – کلام کا بیج بونا ، شاگرد سازی کرنا اور چرچز کا قیام کرنا ۔ فریزر  کے الفاظ کے مطابق لکڑیوں کو جلا کر چھوٹی سی آگ جلانا ۔

بھائیو  اور بہنو! اس دوڑ میں آگے بڑھتے ہوئے اس بات کا یقین کر لیں کہ     FTT اور اُس جیسی دیگر تنظیموں کی جلائی ہوئی آگ کے الاؤ  ایک دوسرے کی طرف بڑھ رہے ہیں۔ میری بات کا یقین کیجیے   کہ یہ آگ ہم تک پہنچ رہی ہے۔ ہماری نسل میں ہی خُدا کی بادشاہی کا ظہور ہونے والا ہے۔ کیو ں نہ ہو کہ ہم وہ نسل بن جائیں جو اس کام کی تکمیل کرے ؟  FTT   نہ صرف آپ کو یہ مقصد دے رہی ہے ، نہ صرف آپ کو نارسا قوموں کی شناخت اور نشاندہی کرنے کو کہہ رہی ہے، بلکہ آپ کو تربیت دینے کے لئے بھی موجود ہے ۔ یہ تنظیم آپ کے ذریعے آپ کے چرچ اور آپ کی مشنری تنظیم کو متحرک کرنے  کے لئے تیار ہے ۔ تاکہ کلام کا بویا ہوا بیج شاگرد سازی اور چرچز کی تخم کاری کا مقصد اور پھل حاصل کر سکے ۔ جب یہ چرچز پھل لائیں گے تو ہم دیکھیں گے کہ مزدورں کی ایک بہت بڑی اور بڑھتی ہوئی تعداد مشن  کی ذمہ داری میں ہمارے ساتھ شامل ہو جائے گی ۔

آیئے دعا کریں۔    اے خُدا ،تو نے پہلی صدی میں اپنے روح ،اپنے اختیار اور اپنی ہدایت کے ذریعے جو کچھ کیا ، ہمیں یقین ہے کہ تو ہماری نسل میں بھی وہی کچھ کر رہا ہے۔ بلاہٹ کاکام کر۔ اے خُداوند ہمارے اُن بھائیوں اور بہنوں کو نارسا قوموں میں  بھیج جو تیری بلاہٹ کا جواب ہاں میں  دیتے ہیں ۔ اپنی قوت کا اظہار کر۔ اپنی دانش کا اظہار کر۔  اے خُدا تیرا کلام ہمارے دلوں میں ہے۔ ہم کبھی تیرے روح کے راستے سے نہ ہٹیں بلکہ تیرے قدموں کے ساتھ قدم ملا کر چلیں۔ اے خُداوند ہم کام کے مکمل ہوجانے تک تیری مرضی  سمجھتے اور اُس پر چلتے رہیں  ۔ہم تجھ سے پیار کرتے ہیں اور تیری تمجید کرتےہیں ۔مسیح کے نا م میں، آمین ۔خُدا  کا فضل آپ سب کے ساتھ ہو ۔

خُدا کی محبت کا عملی اظہار چرچز کی تخم کاری کی تحریکوں میں ایک کلیدی کردار ادا کرتا ہے۔ اس سے نہ صرف خوشخبری دینے کے لئے دروازے کھُلتے ہیں بلکہ لوگوں کی زندگیوں   اور اُن کے معاشروں میں خُدا کی بادشاہی کا پھل نظر آنے لگتا ہے ۔

ایکسیس منسٹریز،نیو ہارویسٹ منسٹریز(NHM) کا ایک ستون ہے ۔اپنی ابتدا سے ہی نیوہارویسٹ نے 12 ممالک میں 4000 سے زائد آبادیوں کے درمیان خُدا کی محبت کے اظہار ، شاگرد سازی اور چرچز کے قیام میں اہم کردار ادا کیا ہے۔ جوش، جذبے اور محبت سے بھرپوران سر گرمیوں نے نہ صرف لاکھوں لوگوں کو شاگرد بنایا ہے، بلکہ دس ہزار سے زائد نئے مسیحی راہنما تخلیق کرنے میں بھی کلیدی کردار ادا کیا ہے۔ 

ہمدردی، خُدا کی بادشاہی کی اقدار میں سے ایک لازمی قدر ہے ،جو شاگرد سازی کی ہر تحریک کا بنیادی اصول ہے ۔ہم لوگوں تک رسائی کے لئے مختلف قسم کی درجنوں  منسٹریاں چلا رہے ہیں ۔ان میں سے ہر ایک ،افریقہ میں خُدا کی بادشاہی کی پیش روی کے لئے اپنے اپنے مخصوص کردار میں  ہماری معاون ہے۔ ان میں سے زیادہ تر منسٹریوں   پر کچھ خاص خرچہ نہیں اُٹھتا  ،لیکن خُدا کی مدد کے ساتھ اُن کا اثر بہت زیادہ ہے۔ ہم ہر منسٹری میں مقامی افراد کے ساتھ شراکت کرتے ہیں۔ عام طور پر وہ ہمیں قیادت ، کارکن اور وسائل مہیا کرتے ہیں –   یہ بنیادی ضروریات پوری کرنے کے لئے اُس علاقے میں موجود ہوتی ہیں ۔

دلیر انہ جذبہ

نیو ہارویسٹ  سیرا  لیؤن میں ہمارے  ہیڈ کوارٹر کے ذریعے  کئی ممالک میں خدمات انجام دے رہی ہے ۔جب 2014 میں   ایبولا کی وبا پھیلی تو ہم سے یہ نا ہو سکا،  کہ  ہم محفوظ مقامات پر بیٹھے رہیں اوراپنے  اردگرد پھیلی ہوئی آفت سے نہ نمٹیں ۔ اس وبا نے خاص طور پر کئی مسلمان دیہاتوں کو شدت سے متاثر کیا تھا، کیو نکہ تدفین کے اسلامی طریقوں پر عمل کی وجہ سے وہاں یہ وبا بہت بُری طرح پھیل رہی تھی ۔ ایبولا کی وجہ سے لوگ ، ناگہانی  مرتے ہُوئےاپنے    والدین یا بچوں کو بھی چھونے سے گریز کرنے لگے تھے ۔ اس تناظر میں نیو ہارویسٹ کے کئی راہنماؤں نے رضا کارانہ طور پر خطرناک ترین مقامات پر اپنی خدمات پیش کیں۔ اُن میں سے کچھ بچ گئے لیکن بہت سے اپنی جان گنوا بیٹھے – زیادہ تر مسلمانوں کی خدمت کرتے ہوئے ۔

ایک گروہ کا مسلمان سردار اپنے قرنطینہ میں بند گاؤں سے لوگوں کو بھاگتے دیکھ کر  بہت مایوسی کا شکار  تھا ۔وہ مسیحیوں کو وہاں خدمت کے لئے آتے دیکھ کر بہت حیران تھا۔ اُس نے تنہائی میں جا کر  خُدا سے یہ دعا کی :” اَے خُدا اگر تو مجھے  اور میرے خاندان کو اس وبا سے بچا لے تو ہم سب اُن لوگوں کی طرح ہو جائیں گے  جو ہم سے محبت کااظہار کرتے ہیں اور ہمارے لئے خوراک لاتے ہیں “۔ اُس سردار اور اُس کے خاندان کی زندگی بچ گئی اور اُس نے اپنا وعدہ پورا کیا۔  بائبل کی آ یتیں یاد کر کے ،وہ اُس مسجد میں جاکر سُنانے لگا جہاں  کا وہ امام تھا ۔     اُس گاؤں میں ایک چرچ نے جنم لیا اور اب وہ سردار گاؤں گاؤں جا کر خُدا کی محبت کی خوشخبری پھیلاتا ہے ۔

ممکنہ ضروریات جاننا ، بھٹکے ہوؤں تک رسائی حاصل کرنا

NHM کے لئے ، رسائی کی منسٹریاں ایک گروہ کے لئے بنیادی ضروریات کا تعین کرنے  کےجائزے سے ابتد ا کرتی ہیں ۔ جب ہم ضروریات کے تعین کاجائزہ لیتے ہیں تو اُس گروہ کے ساتھ باہمی احترام اور اعتماد کی بنیاد پر شراکت قائم ہو جاتی ہے ۔ کچھ وقت کے بعد یہ تعلق بائبل کی کہانیاں سُنانے اور دریافتی بائبل سٹڈی تک پہنچ جاتا ہے۔ رسائی کی منسٹریاں انہیں خُدا کی محبت دیکھنے کے قابل بناتی ہیں اور پوری قوت سے اُن کے دلوں کو چھُو لیتی ہیں ۔

خُدا کی بادشاہی کی تحریکوں کی جانب بلندی کی سمت میں سفر

دعا ہمارے ہر کام کی بنیاد ہوتی ہے  ۔سو جب جائزہ مکمل ہو جاتا ہے تو دعا میں شریک ہمارے ساتھی دعا کرتے ہیں کہ خُدا :

٭دروازے اور دل کھولے 

٭پراجیکٹ کے راہنماؤں کے انتخاب میں  مدد دے

٭مقامی لوگ باہیں کھولیں ۔

٭خُدا کی جانب سے معجزے سامنے آئیں 

٭روح القدس کی راہنمائی ملے 

٭خُدا ضروری وسائل مہیا کرے 

دعا میں شریک تمام مراکز اُن علاقوں کے بارے میں جانتے ہیں  جہاں ہم خدمت کے لئے جا رہے ہوتے ہیں ۔وہ اُن میں سے ہر ایک کے لئے روزے رکھتے اور دعا کرتے ہیں ۔ اور خُدا ہمیشہ صحیح وقت پر، صحیح وسائل کے ساتھ ،صحیح دروازہ کھولتا ہے ۔ 

لوگوں تک رسائی کے لئے سب سے زیادہ قوی اور موثر منسٹری یا خدمت کا انداز ، دعا ہے۔ اس سے تحریک کو پھیلاؤمیں بہت مدد ملی ہے ہمیں بلا کسی شک کے یہ یقین ہے  کہ باتسلسل اور تزویراتی انداز سے کی گئی دعا اور روزے تاریکی کی قوتوں کو شکست دیتے ہیں۔ اکثر بیماروں کے لئے دعا سے بھی رسائی کا ایک دروازہ کُھل جاتا ہے ۔ ہم نے مسلسل دعاؤں کے نتیجے میں  دشمنوں کے دروازے کُھلتے دیکھے ہیں ، سلامتی کے فرزند حاصل کیے ہیں اور پورے کے پورے خاندان بچائے ہیں۔ سب جلال باپ کے لئے ہے جو ہماری دعائیں سُنتا اور اُن کا جواب دیتا ہے ۔

دعا ہمارے ہر کام کی بنیاد ہے میں لوگوں سے کہتا ہوں کہ رسائی کی منسٹریوں کے تین اہم عناصر یہ ہیں : پہلا  دُعا  ،دوسرا  دُعا اور  تیسرا  دُعا ۔

ہر پراجیکٹ خُدا ،ہمارے بادشاہ کی مقبولیت کا باعث بنتا ہے

ہم لوگوں تک کلام لے جانے کے لئے سب کچھ کر گذرتے ہیں  تاکہ مسیح  کو جلال حاصل ہو۔  ہمارا کام ہمارے لئے نہیں ہوتا۔ یہ خُداوند کے لئے ہوتا ہے ۔ہم نارسا لوگوں اور قوموں تک تزویراتی حکمت عملی کے ساتھ پہنچ کر انہیں خُداوند خُدا سے روشناس کراتے ہیں ۔

تعلیمی ٹیم

جہاں ہم سمجھتے ہوں  کہ تعلیم بنیادی ضرورت نظر آ رہی ہے، تو ہمارے لئے دعا میں شریک ساتھی اس مقصد کو دعا کے ذریعے خُدا تک لے جاتے ہیں ۔ جب ہم دعا کر رہے ہوتے ہیں تو ہم مقامی لوگوں کے ساتھ  مل کر یہ جاننے کی کوشش کرتے ہیں کہ وہا ں موجود وسائل کیا ہیں ۔ہم یہ معلوم کرتے ہیں کہ وہ اپنی ہی ضرورت پورا کرنے کے لئے ہمیں کیا مہیا کر سکتے ہیں ۔اکثر وہ گروہ ہمیں زمین ،مشترکہ استعمال کی کوئی عمارت یا ایک عارضی عمارت بنانے کے لئے تعمیراتی سازوسامان  فراہم کرتے ہیں ۔

عموما ہم مقامی لوگوں کی حوصلہ افزائی کرتے ہیں کہ وہ اساتذہ کی تنخواؤں کی ادائیگی   بھی کچھ حصہ ڈالیں ۔ اساتذہ پوری طرح سے سند یافتہ ہوتے ہیں ۔ اِس کے ساتھ ساتھ وہ   تجربہ کار شاگرد ساز اورچرچ کے  تخم کار بھی ہوتے ہیں ۔سکول تھوڑے سے بینچوں،پینسلوں اور پینوں ، چاک کے ایک ڈبے اور ایک تختہِ سیاہ کے ساتھ شروع کر دیا جاتا ہے۔ اس سکول کی ابتدا کسی درخت کے نیچے، مشترکہ استعمال کی کسی عمارت میں یا کسی پرانے گھر میں ہو سکتی ہے ۔ہم دھیرے دھیرے آغاز کرتے ہیں ۔ اور سکول کو تعلیمی اور روحانی اعتبار سے ترقی دیتے جاتے ہیں ۔ 

جب کوئی سلامتی کا فرزند اپنے گھر کے دروازے کھول دیتا ہے تو وہ دریافتی بائبل سٹڈی کی میٹنگز اور بعد ازاں ایک چرچ کے لئے ابتدا کا مقام بن جاتا ہے ۔ہم نے سو سے زائد پرائمری سکولوں کا آغاز کیا ہے، جن میں سے زیادہ تر اب مقامی لوگو ں کی ملکیت میں ہیں ۔

اس سادہ سے پروگرام کے نتیجے میں خُدا نے اب تک 12  ثانوی سکول، 2ٹیکنیکل سکول اور ایوری نیشن کالج بھی قائم کر دئے ہیں ۔ یہ کالج ،  سکول آف بزنس اور سکول آف تھیالوجی کے ساتھ الحاق شدہ ہے۔ چند لوگوں کی توقع کے برعکس شاگرد سازی کی تحریکوں کو بھی مضبوط تعلیمی اداروں کی ضرورت ہوتی ہے ۔ 

طبی امداد ، دانتوں کا علاج ، صحت و صفائی

صحت سے متعلقہ کسی ضرورت کی  شناخت کے بعد ہم دوائیوں ، ساز وسامان اور وسائل سے لیس، اعلی ٰ تربیت یافتہ طبی عملے  کی ٹیمیں بھیجتے ہیں۔ ہماری ٹیم کے تمام ممبران تجربہ کار شاگرد ساز ہیں، اور دریافتی بائبل سٹڈی کے عمل کی سہولت کاری کے ماہر ہیں ۔ اُن میں سے بہت سے لوگ چرچز کے قیام کی مہارت بھی رکھتے ہیں ۔ٹیم کے افراد  بیماروں کے علاج کے ساتھ  ساتھ، سلامتی کے فرزند کی تلاش بھی جاری رکھتے ہیں۔ اگر انہیں اپنے دورے میں  سلامتی کا فرزند نہ ملے تو وہ دوبارہ وہاں جاتے ہیں۔، جب سلامتی کا فرزندمل جائے تو وہ ایک پُل کا کام کرتے ہوئے مستقبل میں دریافتی بائبل سٹڈی کا میزبان بنتا ہے ۔ اگر سلامتی کا فرزند نہ ملے تو وہ ٹیم کسی اور علاقے میں چلی جاتی ہے، لیکن پچھلے علاقے  میں دروازے کھولنے کے لئے دعا جاری رکھتی ہے ۔ 

چرچز کے قیام کے دس ماہرین کو دانتوں کے ڈاکٹر وں کے طور پر تربیت دے دی گئی ہے۔  انہیں صحت کے ادارے کے حکام کی جانب سے دانت نکالنے اور فیلنگ کرنے کی اجازت بھی مل گئی ہے ۔ اُن میں سے ایک  چشمہ سازی کا ماہر بھی ہے۔ وہ لوگوں کی نظر کا معائنہ کرتا ہے اور مناسب چشمے فراہم کرتا ہے۔ وہ فیسیں بھی وصول کرتا ہے، تاکہ یہ عمل کسی پر انحصار کرنے کی وجہ سے ر ُک نہ جائے ۔ صحت کی ٹیم کے دیگر ممبران صحت و صفائی ،بچوں کو دودھ پلانے ، غذا اور غذائیت ، بچوں کے لئے حفاظتی ٹیکوں اور حاملہ عورتوں کی دیکھ بھال کی تربیت دیتے ہیں ۔ 

رسائی کی سب سے غیر معمولی منسٹری

ہم یہ سب کچھ مسیح کے انداز میں کرتے ہیں  اور ہماری کوشش یہ ہوتی ہے کہ خُدا کی بادشاہی واضح طور پر نظر آئے ۔خُدا اپنا کام کرتا ہے اور اپنی موجودگی کا اظہار کرتا ہے۔ اس عمل کا آغاز عموما ایک خاندان یا  غیر متوقع مقامی راہنما کے ذریعے ہو تا ہے۔ اس طریقے سے ہم شاگردوں کی مسلسل جاری افزائش ، دریافتی بائبل سٹڈی گروپ اور چرچز کا پھلنا پھولنا دیکھ سکتے ہیں ۔

سیرا لیؤن کے جنوبی حصے میں ایک بہت بڑے علاقے میں داخلہ ہمارے لئے مشکل ثابت ہو رہا تھا ۔وہاں کے مقامی لوگ ،مسیحیوں سے بہت زیادہ عداوت کا برتاؤ کرتے تھے۔ مسیحیوں کی حیثیت سے شناخت کر لئے جانے والے لوگوں کے لئے وہاں داخل ہونا ہی مشکل تھا۔  سو ہم نے اُس شہر کے لئے دعا کی، لیکن وقت گذرتا رہا اور ہماری کوئی بھی حکمت عملی کامیاب نہ ہوئی ۔ 

پھر اچانک ہی کچھ ہو گیا ! قومی خبر رساں ادارے نے اُس شہر  میں صحت کے ایک  مسئلے کی رپورٹ پیش کی۔ نوجوان بیمار ہو کر مر رہے تھے۔ یہ بات سامنے آئی کہ انفیکشن اس وجہ سے پھیل رہا تھا کہ اُس گاؤں میں لڑکوں کا ختنہ کبھی نہیں کیا جاتا تھا ۔جب میں نے اس مسئلے کے لئے دعا کی تو مجھے یوں محسوس ہوا کہ خُدا مجھے بتارہا ہے کہ اُس گاؤں میں خدمت کے لئے بالآخر ایک دروازہ کھول چکا تھا ۔ 

ہم نے رضا کاروں کی ایک طبی ٹیم تیار کی جو مناسب سازوسامان اور ادویات کے ساتھ اُس علاقے میں گئی۔ ہم نے پوچھا کہ کیا وہ ہمیں اس بات کی اجازت دیں گے کہ ہم اُن کی مدد کریں ۔ہمیں یہ جان کر خوشی ہوئی جب مقامی سردار وں نے رضامندی کا اظہار  کر دیا ۔ پہلے ہی روزہماری ٹیم نے 300 سے زائد نوجوانوں کا ختنہ کیا ۔

اگلے چند روز میں وہ نوجوان  صحت یابی کے عمل سے گذر رہے تھے ۔ اس سے ہمیں اُن فراغت کے دنوں میں دریافتی بائبل سٹڈی گروپ کا آغاز کرنے کا موقع ملا ۔ہمیں بہت مثبت ردعمل ملا    ۔ جلد ہی چرچز کے قیام کے ساتھ ساتھ خُدا کی بادشاہی کی پیش روی شروع ہو گئی ! چند سالوں میں اُس مقام پر، جہاں مسیحی داخل بھی نہیں ہو سکتے تھے ، اب خُدا کے جلال کا نور پوری شدت سے چمک رہا ہے ۔ خُدا کے لوگوں کے لئے محبت ، مسلسل دعا کی قوت اور خُدا کے با اثر کلام نے سب کچھ بدل کر رکھ دیا ۔

زرعی ٹیم

رسائی کی منسٹری کی ہماری پہلی ٹیم زراعت کے شعبے سے تھی  ۔ایسے علاقوں میں جہاں کھیتی باڑی زندگی کا لازمی حصہ ہو ،زراعت کے ذریعے لوگوں کی مدد، بہت آسانی سے دروازے کھولتی ہے ۔وہاں زراعت کا دائرہ زیادہ تر چھوٹے پیمانے کی کھیتی باڑی تک محدود ہے جس کی پیدا وار صرف خاندان کی ضرورت کے لئے ہی کافی ہوتی ہے ۔ اکثر اوقات اگلی فصل شروع کرنے کے لئے بیج بھی سنبھال کر نہیں رکھا جاتا ۔ اس صورت حال کو دیکھتے ہوئے ہم نے کسانوں کے لئے بیجوں کے بینک تیار کئے ۔اپنی دیگر ٹیموں میں سے ہم نے  زراعت  کے  9ماہر ین تیار کئے جو چرچ کے تربیت یافتہ تخم کار بھی تھے ۔ زراعت کے یہ ماہرین / شاگرد ساز  کسانوں کو تربیت دیتے ہیں ۔ اس تربیت اور راہنمائی کے نتیجے میں ایسا تعلق پیدا ہوا ہے  جس سے دریافتی بائبل سٹڈی گروپ ، بپتسموں اور بالآ خر چرچز کا قیام ممکن ہو گیا ہے۔ آج بہت سے کسان مسیح کے پیروکار بن چکے ہیں ۔

چرچزکی تخم کاری

ہماری 90 فیصد کاوشوں کے نتیجے میں چرچز قائم ہوئے ہیں۔ اکثر ایک سر گرمی کے نتیجے میں کئی چرچز قائم ہوتے ہیں۔ جب ہم اُن علاقوں میں دوبارہ جاتے ہیں تو ہم افراد  خاندانوں اور پورے علاقے کے گروہوں کی تبدیلی کی گواہیاں سُنتے ہیں ۔لوگوں کے لئے ہمدردی اور محبت کے نتیجے میں خُدا  کو مقبُولیت حاصل ہو رہی ہے !

اِس تحریر کے حصہ ِ اول میں ہم نے آپ کو  دوہری پٹڑی کے ماڈل کے ارتقاء اور پائلٹ پراجیکٹ  کے بارے میں آگاہ کیا تھا۔  اب ہم آپ کو بتاتے ہیں  کہ اس نمونے کے اطلاق کے چار سالوں میں خُدا نے  کیا کام دِکھائے  ہیں۔

3۔ پہلا سال : شرکا کی تربیت اور چھانٹی 

پہلے سال میں ہم نے سولہ مختلف موضوعات پر تربیت فراہم کی۔ اس تربیت کے لئے ہر دوسرے ہفتے ایک پورا  دن مخصوص تھا۔میں نے اس بات پر اتفاق کیا کہ تربیتی موضوعات میں سے نصف، پہلی پٹڑی کے چرچ کی افزائش کریں گے ۔ اس سے اُنہیں یہ جاننے میں مدد ملی کہ ہم پہلی پٹڑی کےظاہری طور پر  موجود چرچ کی خدمت بھی  کرنا چاہتے ہیں لیکن میری ترجیح تربیتی موضوعات میں سے اگلا نصف تھی جسے دوسری پٹری کے گروپ کے لئے تشکیل دیا گیا تھا ۔ اس کا مرکز نگاہ چرچ سے باہر کے مسلمانوں  کی خدمت اور چھوٹے چھوٹے گروپوں میں  خاموشی سے اُن کی شاگرد سازی کرنا تھا ۔

تربیت کا پہلا سال کردار سازی اور قیادت  کی آٹھ بنیادی مہارتوں کی تربیت پر مرکوز تھا ۔ان میں سے ایک مہارت ” دائروی انتظام” کہلاتی ہے۔ ہم اسے اپنی رپورٹوں میں دائرے کی صورت میں استعمال کر کے چھوٹے گروپوں کی افزائش دِکھاتے ہیں ۔ہماری رپورٹ  محض سر گرمی پر نہیں بلکہ اُس کے نتیجے میں آنے والے پھل پرمبنی ہوتی ہے۔ عملی میدان کے لئے ہمیں ایسے کارکنوں کی ضرورت ہوتی ہے جو مختلف قسم کے اسلوب اور حکمت عملیاں استعمال کر سکیں ۔ لیکن سب سے بڑھ کر ہم اُس پھل کا تخمینہ لگانا چاہتے ہیں جو ان سر گرمیوں  کے نتیجے میں سامنے آتا ہے۔ سو ہم عملی میدان میں کام کرنے والوں کو ترقی کے عملی اشاریوں کی نشاندہی کرنا سکھاتے ہیں۔  جب وہ ان نشانات اور علامات سے متفق ہو جاتے ہیں تو ہم باقاعدہ طور پر مشترکہ  تجزیہ کاری کا آغاز کر دیتے ہیں ۔

“دی کنگڈم اَن لیشڈ” نامی کتاب سے اقتباسات

مصنفین  جیری ٹروس ڈیل  اور گلین سن شائن کی اجازت سے

 میں نیروبی کینیامیں واقع لائف وے مشن کا صدر ہوں۔ میں نیو جنریشنز ،ایسٹ افریقہ ریجن کے ڈائریکٹر کی حیثیت سے بھی خدمات انجام دیتا ہوں۔ میں شاگرد سازی کے وسائل اور مواد کی ترتیب و تشکیل کی اہمیت کے بارے میں کچھ باتیں آپ کو بتانا چاہتا ہوں۔ جب آپ شاگرد بناتے ہیں تو آپ کے پاس وہ مطلوبہ مواد اور وسائل ہونا ضروری ہیں جو اس عمل میں آپ کی مدد کریں ۔بہت سے چرچز اور مشنری تنظیموں نے یسوع  کےاس حکم کی تعمیل   کرنے کی کوشش کی ہے  کہ “جاؤ اور شاگرد بناؤ” ۔لیکن ان میں سے کچھ تنظیمیں شاگرد بنانے میں غیر مؤثر رہی ہیں ،کیو نکہ اُن کے پاس دوسرے لوگوں کو یسوع کے شاگرد بنانے کے لئے ضروری وسائل کی کمی ہے۔ میں چاہتا ہوں کہ ہم مل کر شاگرد سازی کے مواد کی ترتیب وتشکیل کے عمل پر تحقیق کریں، جو ہمیں لوگوں کو یسوع کے شاگرد بنانے میں مدد دے سکتے ہیں۔

 میرے خیال کے مطابق شاگرد سازی  کے مواد کی ترتیب کے تین  مرحلے ہیں۔ پہلا مرحلہ تیاری کا ہے۔ اس مرحلے پر اُن چیزوں کو دیکھا جاتا ہے جنہیں شاگرد سازی کے مواد کی ترتیب کا آغاز کرنے سے پہلے جاننا ضروری ہے۔ دوسرا مرحلہ اپنے وسائل اور تربیتی مواد کو سیشنز اور موضوعات میں ترتیب دینا ہے، جو کہ نئے شاگردوں کی ضروریات سے ہم آہنگ ہو ۔تیسرا مرحلہ  مواد کی تیاری اور ترتیب ہے۔ ہم شاگرد سازی کے مواد کی ترتیب وتشکیل کے اصولوں پر نظر ڈالیں گے اور ہماری توجہ کا مرکز اُس کی تیاری ہو گا ۔

تیاری میں چار کام کرنے ضروری ہیں ،جو کہ ہر اُس شخص کو کرنے ہوتے ہیں جو شاگرد سازی کا  مواد ترتیب دے رہا ہو۔ سب سے پہلا کام ہے دعا۔ شاگرد ساز کے لئے ضروری ہے کہ وہ خُدا سے دعا کرے کہ وہ نئے شاگردوں کی ضروریات کے مطابق مواد کی تشکیل میں اُس کی راہنمائی کرے۔ ہمیں خُدا کے دل کو جاننا ہے اور روح القدس کی راہنمائی  کے لئے دعا کرنی ہے۔ روح القدس، بہترین مواد تیار کرنے میں ہماری راہنمائی کرے گا ،اور یہ مواد اُتنا ہی ا ہم ہے جیسے ایک نو مولود بچے کو اُس کے لئے موزوں غذا دینا ۔ یہ اس لئے ہے کہ نئے شاگرد کو بہت سی نئی چیزیں سیکھنی ہوتی ہیں ۔ اگر ہم موثر طور پر دعا نہیں کر سکیں گے  تو ہم اس معاملے میں نہ ہی خُدا کی مرضی جان سکیں گے، اور نہ ہی روح القدس کی راہنمائی حاصل کر سکیں گے۔ سو سب سے پہلا مرحلہ دعا کے ذریعے خُدا کو اپنے ساتھ شامل کرنا ہے ۔  

دوسرے نمبر پر اہم بات یہ ہے کہ ہم اُن لوگوں کے بارے میں بہترین طور پر معلومات حاصل کریں جنہیں ہم تعلیم دینا چاہتے ہیں ۔ نارسا قوموں اور گروہوں تک رسائی کی ابتدا  میں،  ہم انہیں ٹھوس غذا نہیں کھلا سکتے ۔ جب   وہ مسیح کے ایمان میں نئے نئے داخل  ہوئے ہوں، ہمیں یہ جاننے کی ضرورت ہوتی ہے کہ وہ اپنے روحانی سفر میں کس مقام پر ہیں؟ وہ کیا کچھ جانتے ہیں ؟ وہ کیا نہیں جانتے ؟ اُن کی تعلیمی استعداد کیا ہے ؟ اُن کی معاشی صورت حال کیا ہے ؟ انہیں کیسے چیلنجز کا سامنا ہے ؟ کیا اُن کا تعلق ایک مسلمان پس منظر سے ہے یا ہندو  پس منظر سے ؟ اُن کی عمر کیا ہے ؟ شاگرد سازی کے تربیتی مواد کی تیاری سے پہلے ہمارے لئے یہ سب کچھ جاننا بہت ضروری ہے ۔ اسی لئے کوئی بھی شاگرد ساز  جو کہ شاگردسازی کا تربیتی مواد تیار کرنا چاہے ، اُس کے لئے ضروری ہے کہ وہ اپنے ممکنہ شاگردوں کو بہترین طور پر جان لے میں نے بہت سے لوگوں کو دیکھا ہے کہ  جو ایک مقام سے دوسرے مقام پر جاتے ہوئے ایک ہی مواد اپنے ساتھ لے جاتے ہیں اور یہ سمجھتے ہیں کہ وہ مختلف قسم کے علاقوں اور قوموں میں ایک ہی طرح سے استعمال کیا جا سکتا ہے ۔ یہ طریقہِ کار مؤثر نہیں ہے۔ مثال کے طور پر کچھ لوگ ایسے ہوں گے جو کہ صرف زبانی تربیت حاصل کرنے کے قابل ہوں ۔اور دوسرے ایسے ہوں گے جن کا اچھا خاصہ تعلیمی میعار ہو ۔اگر آپ اپنے ممکنہ شاگردوں کی استعداد کو صحیح طور پر نہ سمجھیں، تو آپ کے لئے شاگرد سازی کا مؤثر تربیتی مواد تیار کرنا بہت مشکل ہو جائے گا۔ اسی لئے تیاری کا دوسرا مرحلہ بہت ہی اہم ہے ۔ یہ کہ ہم اپنے ممکنہ شاگردوں سے واقف ہوں چاہے وہ گروپ کی حیثیت میں ہوں یا انفرادی حیثیت میں ۔ لازمی ہے کہ ہم انہیں بہت اچھی طرح جان لیں ۔ 

تیسری  سرگرمی ایک ایسی ٹیم کی تیاری ہے جو شاگرد سازی کے تربیتی  مواد کی تیاری اور تشکیل پر کام کرے ۔ ضروری ہے کہ اس ٹیم میں  ایسے لوگ موجود ہوں جنہیں اُس قوم یا گروہ کےلوگوں کے  درمیان کام کرنے کا تجربہ ہو، جنہیں آپ شاگرد بنانا چاہتے ہیں۔ یہ ٹیم مل کر مختلف خیالات جمع کر سکتی ہے ، سوچ و بچار سکتی ہے اور دعا کر سکتی ہے ۔ وہ ممکنہ شاگردوں کے گروپ کے بارے میں تفصیلات بھی حاصل کر سکتی ہے۔ اس عمل کے لئے ایک ٹیم کا ہونا بہت زیادہ اہم ہے، کیو نکہ کوئی شخص اکیلا بیٹھ کر اُن مسائل کا ادراک نہیں کر سکتا  جو ممکنہ شاگردوں کے گروپ کی شاگرد سازی کے وقت سامنے آ سکتے ہیں ۔ 

میں نے دیکھا ہے کہ دنیا بھر کے لوگ آن لائن  تربیتی مواد ڈاؤن لوڈ کرتے رہتے ہیں ، جو کہ عموما ً   اُن لوگوں کی ضروریات کے مطابق بھی نہیں ہوتا ،جن کی وہ شاگرد سازی کرنا چاہتے ہیں ۔ ہاں یہ ضروُر ہو سکتا ہے کہ ہم دوسرے قبیلوں یا دوسری قوموں سے کچھ خیالات اور نکات مُستعار لے لیں  ۔ لیکن اس کا مطلب یہ ہر گز نہیں کہ کسی ایک علاقے کے لوگوں کے ویسے ہی مسائل ہوں گے  جیسے دوسرے علاقے کےہیں ۔ اس لئے یہ بات انتہائی اہمیت کی حامل ہے کہ اس ٹیم کو کسی مخصوص گروہ  کے بارے میں  مکمل معلومات اور سمجھ بوجھ حاصل ہو ۔

چوتھی سر گرمی تجزیہ کرنا ہے۔ یہ ٹیم مل کر اُن مسائل کا تجزیہ کر سکتی ہے   جنہیں کسی مخصوص گروہ کی شاگرد سازی کے عمل کے دوران حل کرنا ضروری ہو۔ ٹیم ضروری معلومات اکٹھی کرے گی   اور ممکنہ شاگرد وں کے گروہ کو در پیش مسائل اور چیلینجز کو نظر میں رکھے گی ۔ ایسے کون سے دنیاوی مسائل ہیں جن کا کلام کی روشنی میں حل کیا جانا ضروری ہے ؟ اُن کے مذہبی اعتقادات کیا ہیں، جن پر  شاگرد سازی کے عمل کے دوران کام کر نا ضروری ہے ؟ 

مندرجہ بالا نکات کی روشنی میں آپ شاگرد سازی کے مواد  میں سے اپنے موضوعات  کا انتخاب کر کےسیشنز ترتیب دے سکتے ہیں۔ اگر آپ ممکنہ شاگردوں کے گروہ کے بارے میں معلومات  کا حصول اور تجزیہ کرنے سے قاصر ہوں تو آپ کو اندازےکی بنا پر چلنا پڑتا ہے کہ کو ن سی چیز اُن کے لئے موزوں ہو سکتی ہے۔ لیکن  عین ممکن ہے کہ آپ کا خیال غلط ہو ۔ آج کے دور میں استعمال ہونے والے شاگرد سازی کے بہت سے وسائل، ممکنہ شاگردوں کی روحانی اور مادی ضروریات پوری نہیں کرتے۔ اس لئے ضروری ہے کہ ہمارے پاس ایک ٹیم موجود ہو جو کہ ہر قبیلے اور ہر قوم کی ضروریات کے مطابق تجزیہ کر کے موضوعات  ترتیب دے ۔شاگرد سازی کے  تربیتی مواد کی تیاری کے پہلے مرحلے میں  یہ سر گرمیاں بہت اہم ہیں ۔ ہمیں اس میں جلد بازی کرنے کی ضرورت نہیں ہے ۔ آپ جتنا وقت لگائیں گے ،اتنا ہی بہتر طور پر آپ کسی گروہ کی ضروریات سمجھ سکیں گے ۔اس سے آپ اس قابل بن جائیں گے کہ آپ لوگوں کو اُن کے اپنے تہذیبی اور معاشرتی تناظر کے مطابق  مؤثر طور پر یسوع کے شاگرد بنا سکیں ۔

جب مجھے میرے فون پر ایک خفیہ پیغام موصول ہوا تو میں اُس کے سادہ اور جرات مندانہ انداز پر حیران رہ گیا۔ اور ساتھ ہی میرے دوست اور مشرق وسطیٰ میں میرے شراکت دار ” ہیرلڈ ” کے الفاظ نے میرے اندر شکرگزاری کے جذبات پیدا کر دیئے۔اگر چہ وہ ایک سابق امام، القاعدہ کا          دہشتگرد اور طالبان کا راہنما رہا ہے ، یسوع کی معافی کی قوت سے اُس کا کردار کُلی طور پر تبدیل ہو گیا ہے۔  میں اپنی اور اپنے خاندان کی زندگی کے معاملے میں ہیرلڈ پر مکمل اعتماد کر سکتا ہوں ، اور میں ایسا کر بھی چکا ہوں ۔ہم مشترکہ طور پر دنیا کے 100 سے زائد ممالک میں گھریلو چرچز کی تحریک کے ایک  نیٹ ورک کی قیادت کر رہے ہیں ،جسے انطاکیہ کے خاندان کے چرچ کہا جاتا ہے۔ 

اُس سے دو دن قبل میں نے ہیرلڈ کو ایک پیغام بھیجا تھا جس میں مَیں نے پوچھا تھا کہ کیاسابقہ مسلمان اور اب مسیح کے پیچھے چلنے والے بہن  اور بھائی جو عراق میں رہ رہے ہیں اُن میں  سے کوئی یذیدیوں کی مدد کرنے کے لئے تیار ہو گا یا نہیں۔ اُس نے جواب دیا :

” میرے بھائی، خُدا پہلے ہی کئی مہینوں سے اس بارے میں ہم سے بات کر رہا ہے ۔ اور اُس کا حکم عبرانیوں 3: 13 کی بنیاد پر ہے: ” اور جن کے ساتھ بد سلوکی کی جاتی ہے اُن کو بھی یہ سمجھ کر یاد رکھو کہ ہم بھی جسم رکھتے ہیں ” ۔کیا آپ ایذارسانی کی شکار مسیحی اور یزیدی اقلیتوں کو ISIS سے بچانے کے لئے ہمارے ساتھ کھڑے ہونے کے لئے  تیار ہیں ؟ “

میں اس کا کیا جواب دے سکتا تھا؟  گذشتہ کئی سالوں سے ہماری دوستی ایک مضبوط عہد میں بندھ گئی تھی کہ ہم مل کر یسوع کے ساتھ ایک ہی راستے پر چلیں گے اور ارشادِاعظم  کی تکمیل کے لئے مل کر  کام کریں گے۔ ہم مل کر ایسے راہنماؤں کی تربیت پورے جوش وجذبہ سے کر رہے تھے جو خود کو مسیح کے حوالے کر کے مزید شاگردوں کی افزائش کریں اور پھر قوموں تک اُس کی محبت کا پیغام لے کر جائیں ۔ اب ہیرلڈمجھے ایک اور بڑا قدم اٹھانے کو کہہ رہا تھا کہ میں لوگوں کو گناہ کی غلامی اور ISIS کے خوفناک جرائم سے بچانے میں اُس کی مدد کروں میں نے جواب دیا : ” ہاں میرےبھائی میں تیار ہوں۔ اب دیکھتے ہیں  کہ خُدا کیا کرتا ہے ”   

چند ہی گھنٹوں میں مشرق وسطیٰ میں چرچز قائم کرنے والی تربیت یافتہ اور تجربہ کار ٹیمیں تیار ہو گئیں جو اپنی اپنی کام کی جگہ چھوڑ کر ISIS سےلوگوں کو نجات دلانے کے  لئے سب کچھ کرنے کے لئے  رضا مند تھیں ۔ یہ جان کر ہمارے دلوں میں ایک دائمی تبدیلی آ گئی۔

 خُدا ہم سے پہلے ہی یہ کام کر رہا تھا! ISIS کی درندگی اور ظلم کا شکار ہونے والے یزیدی ہمارے زیر زمین خفیہ مقامات تک پہنچنے لگے تھے۔ ان مقامات کوہم ” کمیونٹی آف ہوپ رفیوجی کیمپس” کہتے ہیں ۔ ہم نے مفت طبی امداد، ذہنی صدمے سے نکالنے کے لئے مشاورت، تازہ اور صاف پانی ، پناہ گاہ اور تحفظ فراہم کرنے کے لئے مقامی مسیحیوں کی ٹیمیں متحرک کر دیں۔ یہ گھریلو چرچز کے مسیحی پیروکاروں کی ایک تحریک تھی جو اپنے ایمان کا عملی اظہار کر کے دوسرے لوگوں کو متاثر کر رہے تھے ۔ 

ہم نے یہ بھی جانا کہ اُن ٹیموں کے بہترین کارکن قریبی گھریلو چرچز سے تعلق رکھتے تھے ۔ وہ زبان اور تہذیب سے واقف تھے اور اُن کے دلوں  میں انجیل کی منادی اور چرچز قائم کرنے کا جذبہ تھا۔ دیگر NGOs جو حکومت کے ساتھ رجسٹرڈ تھیں اُنہیں ایمان کے پیغامات دینے کی اجازت نہیں تھی ۔ لیکن مقامی چرچز کی جانب سے غیر رسمی کاوشیں دعاؤں ، کلام پڑھنے ، شفا دینے ،محبت اور دیکھ بھال سے بھرپور تھیں ! اورچونکہ ہماری ٹیم کے راہنماؤں کو یسوع کی جانب سے عظیم معافی کا فضل مل چکا تھا ۔ تو اُن کی زندگیاں خود کو یسوع کے حوالے کر دینے اور بے انتہا جرات کے جذبے سے  عملی طور پر بھرپور تھیں ۔

جلد ہی ہمیں خطوط موصول ہونے لگے :

میرا تعلق ایک یزیدی خاندان سے ہے ۔ایک طویل عرصے سے جاری جنگ نے میرے ملک کے حالات بہت خراب کر دیئے ہیں۔ لیکن اب ISIS کی وجہ سے یہ حالات مزید بگڑ گئے ہیں ۔

گذشتہ ماہ اُنہوں نے ہمارے گاؤں پر حملہ کیا ۔انہوں  نے بہت سے لوگوں کو قتل کر دیا اور مجھے کچھ اور لڑکیو ں سمیت اغوا کر لیا ۔ان میں سے بہت سو ں نے میری آبرو ریزی کی میرے ساتھ جانوروں جیسا سلوک کیا ۔ حکم نہ ماننے پر مجھے کئی مرتبہ مارا پیٹا گیا۔ میں نے اُن سے التجائیں کیں، ” خُدا کے لئے میرے ساتھ یہ نہ کرو،” لیکن وہ ہنس کر یہ کہتے ” تم ہماری غلام ہو ۔” انہوں نے بہت سے لوگوں پر میرے سامنے تشدد کیا اور بہت سو ں کو قتل بھی کیا ۔

 ایک روز وہ مجھے فروخت کرنے کے لئے کسی دوسری جگہ لے گئے۔میرے ہاتھ بندھے ہوئے تھے۔  اور جب میں اپنے خریدنے والوں کے ساتھ چلی تو میں چیخ چیخ کر رو رہی تھی۔  30 منٹ کے بعد   خرید ار نے کہا، ”  میری عزیز بہن، خُدا نے  ہمیں یزیدی لڑکیوں کو ان بدکردار لوگوں سے بچانے کے لئے بھیجا ہے۔ تب میں نے دیکھا کہ انہوں نے 18 لڑکیوں کو خریدا تھا ۔

جب ہم کمیونٹی آف ہوپ کیمپ پہنچے تو ہم سمجھ گئے کہ خُدا نے ہمیں بچانے کے لئے اپنے لوگوں کو بھیجا تھا۔ ہمیں یہ بھی معلوم ہوا کہ ان آدمیوں کی بیویوں نے اپنے سونے کے زیورات بیچ کر ہمیں چھڑانے کی قیمت ادا کی تھی۔ اب ہم محفوظ ہیں ، خدا کے بارے میں جان رہے ہیں اور ایک اچھی زندگی گزار رہے ہیں ۔ 

( ہمارے کمیونٹی آف ہوپ رفیوجی کیمپ  کے ایک لیڈر کی جانب سے ایک خط )

 کئی یزیدی خاندانوں نے یسوع مسیح میں ایمان کو قبول کر لیا ہے اور وہ ہمارے راہنماؤں کے ساتھ مل کر اپنے لوگوں کے لئے کام اور خدمت انجام دینا چاہتے ہیں ۔ یہ بہت اچھی بات ہے کیونکہ وہ انہیں اپنے تہذیبی اصولوں اور طریقوں کے مطابق ایمان  کا پیغام دے سکتے ہیں ۔ آج مسیح کے پیروکار متاثرہ لوگوں کے لئے دعاؤں میں مصروف ہیں کہ خُدا  اُن کی ضروریات پوری کرے اور انہیں مسلم انتہا پسندوں سے محفوظ رکھے۔  براہ ِکرم ہمارے ساتھ دعا میں شامِل ہوں  ۔

 ایک معجزے کا آغاز ہو چکا تھا ۔آس پاس کی قوموں میں سے خود کو مسیح کے حوالے کر دینے والوں کی ایک تحریک شروع ہو چکی تھی۔ یہ لوگ جو اس سے قبل اسلام میں پھنسے ہوئے تھے ،انہیں اُن کے اپنے گناہ سے نجات مل چکی تھی اور اب وہ اپنے منجی یسوع کے لئے زندگیاں گزار رہے تھے۔ وہ دوسروں کو بچانے کے لئے  اپنی جانیں قربان کر رہے تھے ۔ اب یزیدیوں کے درمیان مسیح کے پیروکاروں کی ایک دوسری  تحریک کا آغاز ہو چکا ہے۔

 یہ سب کیسے ممکن ہوا ؟ ڈی ایل موڈی کے الفاظ کے مطابق : ” دنیا نے ابھی تک نہیں دیکھا کہ خُدا ایسے شخص کے ساتھ مل کر کیا کچھ کر سکتا ہے جو اپنے آپ کو پوری طرح اُس کے حوالے کر دے ۔ خُدا کی مدد کے ساتھ میں ایک ایسا شخص بننے کا مقصد رکھتا ہوں ۔”

میرا نام ولیم جے ڈبیوس ہے اور میں انطاکیہ کے خاندان کے چرچز کا شریک راہنما ہوں ،جو مقامی چرچز کی تخم کاری کی تحریکوں کا ایک عالمگیر اتحاد ہے۔ گذشتہ 30 سالوں میں ہم نے پہلی نسل کے ایسے مسیحیوں میں قائدین کی تعمیر پر توجہ مرکوز رکھی ہے  جن کا تعلق اُن ممالک سے ہے  جہاں رسائی مشکل ہے ۔  ہم انہیں ایسے علاقو ں میں گھریلو چرچز کی افزائش کی تربیت میں مدد دیتے ہیں۔میرا آج کا موضوع مسلمانوں  میں چرچز کی تحریکوں کا آغاز ہے ۔

ہمارے گزشتہ بیس سال کے کام کے دوران ہماری کوششیں اکثر بے سمتی ، غلطیوں، اور ناکامیوں کا شکار رہی ہیں ۔تاہم اپنی زندگی میں ایک ذاتی بحران سے گذرنے کے بعد میں نے کچھ ایسا سیکھا ،جس سے ہم کامیابی کے راستے پر گامزن ہو گئے ۔ 2004 میں میں زیر زمین ایرانی گھریلوچرچ کے راہنماؤں کو تیمتھیس کے دوسرے باب کی تعلیم دے رہا تھا۔ اس تربیت کے مکمل ہونے کے بعد مجھے القاعدہ  کے ایک ایجنٹ نے زہر دے دیا اور میں قریب المرگ ہو گیا۔ بہت سے لوگ میرے لئے دعائیں کر رہے تھے اور ڈھائی مہینوں تک ڈاکٹروں اور ہسپتالوں کے چکر لگانے کے بعد میں معجزاتی طورپر صحت یاب ہو گیا ۔ میں اس کے لئے خُدا کا بہت شکر گزار ہوں !

لیکن اس کہانی کا سب سے متاثر کُن پہلو بعد میں سامنے آیا۔ دراصل کئی سال کےبعد ،مَیں افغانستان، عراق اور پاکستان سے تعلق رکھنے والے چرچز کی تخم کاری کے راہنماؤں کی تربیت کی میزبانی میں شریک تھا۔ تربیت کے ابتدائی مرحلے میں ہم ایک دوسرے کو  اپنا تعارف کروا رہے تھے ۔ تب مجھے پتہ چلا کی چرچز کی بنیاد رکھنے والوں میں وہ شخص بھی تھا  جس نے مجھے زہر دیا تھا ۔ 

اُس لمحے میری سمجھ میں آنے لگا کہ تحریکوں کی افزائش کو محض بین التہذیبی زبانیں اور تہذیب اور ثقافت کو سمجھنے کی اہلیت رکھنے سے بڑھ کر بھی کچھ چاہیے ہوتا ہے ۔ نئے جنم کی قوت ملنے کا آغاز لوگوں کی روحوں کو جاننے سے ہوتا ہے اور خاص طور پر اس معاملے میں ایسے لوگوں کو گہرائی میں جاننے سے، جو برائی اور شیطان کی راہ پر چل نکلے ہوں ۔خدا نے مجھے لوگوں کے دلوں کو سمجھنے کے سفر پر ڈال دیا جس سے میں یہ جاننے کے قابل ہونے لگا کہ مسلمانوں میں تحاریک کا آغاز کرنے کے لئے کیا درکار ہو گا ۔

آج انطاکیہ کے خاندان کے چرچ 157 ملکوں میں 1225 تحریکوں میں سر گرم ہیں اور 748 زبانیں  بولنے والے لوگوں تک رسائی حاصل کر چکے ہیں ۔ان علاقوں میں 23 لاکھ گھریلوچرچز ہیں جن کے بالغ ممبران کی تعداد 4 کروڑ 20 لاکھ ہے۔ خُدا نے جو کُچھ ہم میں اور ہمارے درمیان شروع کیا ، اُس کا آغاز غلط فیصلوں ،ٹوٹے ہوئے جذبوں اور غلط فہیموں کے ساتھ ہوا ۔لیکن خُدا نے اپنے فضل سے ہمیں ایسی  با اثر اور قوی صلاحیتیں  اور موثر اصول سیکھنے میں مدد دی جس کے ذریعے بے انتہاکامیابی حاصل ہو چکی ہے۔ 

ہماری توجہ تین ترجیحات پر مرکوز ہوتی ہے۔ سب سے پہلی یہ کہ لوگوں کو غلامی سے بچا کر بیٹے بننے کی طرف لایا جائے ۔ غلامی چاہے انسانی تجارت کی شکل میں ہو ،لیکن یہ ہر صورت میں گناہ کی غلامی ہوتی ہے۔ غلامی کی زندگی نسلی امتیاز،  تکلیفوں اور ٹوٹے ہوئے دل کے جذبات سے بھری ہوتی ہے ۔لیکن جب یہ لوگ یسوع مسیح کے ذریعے خُدا کے ساتھ ایک ذاتی رشتے میں جُڑ جاتے ہیں تو وہ زندہ خُدا کے بیٹے اور بیٹیاں اور اُس کے وارث بن جاتے ہیں ۔ سو نئے ایمانداروں کے ساتھ ہمارا رشتہ نسلوں کی بنیاد پر نہیں ہوتا ۔یہ ایک خاندان کی  صورت میں ہوتا ہے، کیو نکہ ہم انہیں مسیح میں بپتسمہ لینے کے بعد چرچ میں، اور پھر دنیا میں بپتسمہ لینے کو کہہ رہے ہوتے ہیں ۔ ہم کسی کو بھی منجی کو جان لینے سے پہلے اپنے دائرے میں شامل ہونے کو نہیں کہتے ۔ہم اس بات کو یقینی بناتے ہیں کہ سب سے پہلے وہ ہمارے  منجی سے ملاقات کر لیں ۔ پھر ہم مل کر اس بات کا تعین کرتے ہیں  کہ اُن کی اپنی ثقافت میں چر چ کی ساخت کیا ہونی چاہیے ۔ سو سب سے پہلی ترجیح غلامی سے نجات  دلا کر بیٹے بنانے کی ہے ۔ 

 ہماری دوسری ترجیح لوگوں کو یہ اختیار دینا ہے کہ وہ دوسروں کو مسیحی کی جانب لا سکیں ۔آپ نے سلامتی  کے فرزند کی تلاش کی اصطلاح سن رکھی ہو گی ۔ہمارے طریقہ ِکار کے مطابق ہم سب سے  پہلے ایک بااثر مرد یا عورت کی تلاش کرتے ہیں ۔ اس طریقہ کار کو کرنیلیس کا نمونہ کہتے ہیں ۔ جس کا ذکر اعمال کی کتاب کے10 ویں باب میں ہے ۔ ہم خُدا سے دعا کرتے ہیں کہ وہ ہمیں ایسے لوگوں سے ملائے جو اپنے گاؤں  ،اپنے معاشرے یا اپنے ملک پر گہرا اثر و نفوذ رکھتے ہوں۔ ہم اُن تک انجیل کا پیغام لے کر جاتے ہیں ،جس کے بعد وہ اپنی پوری قوم یا سماجی رابطوں سے منسلک سب لوگوں میں  خوشخبری پھیلانے لگ جاتے ہیں ۔ اور پھر جس طرح پولس رسول نے ططس سے ہر چرچ میں پاسبان متعین کرنے کو کہا تھا ، ہم بھی اپنے ہر کرنیلیس کو یہ کہتے ہیں کہ وہ ہر گھریلو چرچ میں راہنما تیار کریں۔ اس طرح ہماری خدمت ایک سے دوسرے چرچ تک پھیلتی چلی جاتی ہے ۔یہ کسی تنظیم سے چر چ کا رابطہ نہیں ہوتا بلکہ ایک مقامی چرچ کسی دوسرے مقامی گھریلوچرچ کے ساتھ شراکت کر کے خُدا سے پوچھتا ہے کہ کیا کرنے کی ضرورت ہے، اورپھر دونوں مل کر وہ کام کرتے ہیں ۔ 

پھراس کے بعد ہماری تیسری ترجیح آتی ہے جو کہ  افزئش ہے۔ تیمتھیس 2:2 کے مطابق ہماری ذمہ داری ہے کہ جو باتیں ہم نے بہت سے گواہوں کے سامنے سُنی ہیں اُن کو ایسے دیانت دار آدمیوں کے سپُرد کریں جو اوروں کو بھی سِکھانے کے قابل ہوں۔ یہ تین نسلوں تک کی افزائش ہے۔ ہم نے یہ جان لیا ہے کہ اگر ہم راہنماؤں کی نسل در نسل افزائش کریں تو اُس کے ذریعے ہم تحریکوں کی افزائش کر سکتے ہیں۔ ہماری قیادت کی تربیت محض تعلیم کی بجائے فرمانبرداری پر مبنی ہوتی ہے ۔ میں آپ کو اس کی ایک مثال دوں گا۔ کئی سال پہلے ہم نے ایک بڑے شہر میں ایک نئی خدمت کا آغاز کیا  اور ہمیں ایک ایسا شخص ملا جو روحانی چیزوں میں دلچسپی رکھتا تھا ہمارے ایک کارکن نے اُس کے ساتھ بات چیت کا آغاز کیا اور جلد ہی وہ یسوع کے بارے میں پوچھنے لگا  ۔لیکن اُسے بادشاہی کا تصور گہرائی میں سمجھانے سے پہلے ہم نے اُس سے کہا کہ وہ اپنے پانچ دوست تلاش کر کے لائے۔ 

مقصد یہ نہیں تھا کہ اُن پانچ دوستوں کو گھریلو چرچ کی میٹنگ میں صرف شریک کر لیا جائے۔ بلکہ ہمارا مقصد یہ تھا کہ اُن میں سے ہر ایک کی راہنمائی  ہمارا یہ کرنیلیس کرے ۔پھر اُس کے بعد وہ  پانچ اس پیغام کو مزید پانچ  دوستوں کو سُناتے اور وہ پانچ اپنے مزید پانچ دوستوں کو یہ خوشخبری دیتے۔ سو ابتدا سے ہی ہماری خدمت افزائش کی بنیاد پر قائم تھی ۔

ان تین ترجیحات – نجات ، اختیار اور افزائش کے ذریعے، ہم نے یہ جانا کہ ہم اُن لوگوں سے بہت کچھ سیکھ سکتے ہیں جو مسیح کی جانب آ رہے ہوتے ہیں۔ سو انہیں محض ایمان کے بیان سِکھانے کی بجائے ہم اُن سے بڑے موثر  سوالات پوچھنے سے ابتدا کرتےہیں ۔ جو تین سوالات ہم اُن سے پوچھتے ہیں وہ یہ ہیں ، ” کون روح کے لئے پیاسا ہے ؟ وہ روح کی تلاش کب کر رہے ہیں ؟ اور وہ روحانی طور پر کہاں متوجہ ہیں ؟” اس کے ذریعے ہم اُن لوگوں کے تہذیبی اور روحانی پس منظر اور صُورت ِ حال سے آگاہی حاصل کر تے ہیں جن کی ہم خدمت کرنا چاہتے ہیں ۔ مثال کے طور پر ایسٹر کا موقع مسلمانوں کے لئے کوئی  مذہبی حیثیت یا تقدیس کا حامل نہیں ہے  کیو نکہ وہ ابھی تک مسیح کو جان نہیں سکے ہیں ۔ ہم نے یہ جانا کہ دراصل سا ل بھر میں رمضان کا مہینہ ایک ایسا اہم وقت ہے جب ہم مسلمانوں کو خوشخبری سُنا سکتے ہیں۔ کیوں ؟ کیو نکہ یہ وہ مہینہ ہوتا ہے جب وہ خُدا کو تلاش کر رہے ہوتے ہیں ۔ ماناکہ  وہ کوئی اور خُدا ہے کیو نکہ وہ یسوع مسیح خُدا کے بیٹے کو تلاش نہیں کر رہے ہوتے، تاہم وہ کسی  نہ کسی طرح سے ثواب کمانے کے خواہش مند ہوتے ہیں تاکہ خُدا انہیں قبول کرلے ۔ سو انہیں ایسٹر سے متعارف کروانے کے بجائے ہم نے یہ فیصلہ کیا کہ ہم اُن کے ساتھ چلیں، اُن کے روحانی  نظام الاوقات کو سمجھیں اور اُن کے لئے دعا کریں جو روح کی پیاس رکھتے ہیں۔ اس طرح ہم یہ جان جاتے ہیں کہ اُن کی پیاس کس کے لئے ہے اور اُن کی توجہ کا  مرکز کیا ہے۔ پھر روحانی گفتگو کے بعد ہم ایک کرنیلیس کی تلاش کرتے ہیں ۔ ہم اُس سے کہتے ہیں کہ وہ اپنے دوستوں کو تلاش کرے اورپھر اس طرح سے افزائش کا سلسلہ شروع ہو جاتا ہے ۔

ہم اپنے راہنماؤں کو کلام یا کلیدی آیات کے ترجمے فراہم کرتے ہیں۔  اکثر ہم انہیں وائی فائی باکس بھی مہیا کرتے ہیں ۔  تاکہ وہ محض ایک بٹن دبا کر جیزس ( Jesus)فلم یا نئے عہد نامے کے کچھ حصے مخصوص زبانوں میں نشر سکیں   ۔اگر وہ قوم ابھی تک نارسا ہو تو ہم اپنی ٹیموں کو موبائل بیک پیک بھی دیتے ہیں تاکہ اگر وہ کسی گاؤں میں ہوں تو وہ ایک وقت میں لگ بھگ 300 سو لوگوں کو جیزس(Jesus) فلم دِکھا سکیں۔ اور اس کے ساتھ ہم انہیں لوگوں کے ساتھ روحانی گفتگو کرنے کے  آغاز کی بھی بہت زیادہ تربیت دیتے ہیں  تاکہ اُن لوگوں میں یہ خواہش ابھرے کہ وہ اُس خُدا کوجانیں جو انہیں نجات دے سکتا ہے ، انہیں  اختیار حاصل ہو اور پھر وہ اپنے اثر کی افزائش کر سکیں۔ اس طرح وہ خُدا، یسوع سے مل جاتے ہیں جو انہیں اُن کے گناہوں کی  معافی دینے پر قادر ہے۔

یہ سب کچھ کرتے ہوئے ہمیں یہ بھی پتا چلا کہ اگر ہم مل کر دعا کریں اور مناجات کے لئے ٹیمیں تشکیل دیں تو ایسے لمحات میں بھی بہت بہترین مواقع مل سکتے ہیں ۔ رمضان کے اختتام کے قریب رمضان کی 27 تاریخ کو ایک بہت خاص موقع ملتا ہے جسے شبِ قدر کہتے ہیں ۔       دنیا بھر کے مسلمانو ں کا ایمان ہے کہ اس ایک رات میں کی گئی دعائیں عام دنوں میں کی گئی دعاؤں سے  ہزاروں گنا زیادہ موثر ہوتی ہیں ۔   اُس رات میں وہ خُدا سے دعا کرتے ہیں کہ وہ خود کو اُن پر آشکار کرے۔وہ خُدا سے گناہوں کی معافی طلب کرتے ہیں اور وہ اپنی خواہشوں اور ضروریات کے لئے بھی دعائیں کرتے ہیں۔ سو ہم اپنے لوگوں کو اُن لوگوں میں شامل ہونے کے لئے بھیجتے ہیں جو ایسے خدا کو تلاش کر رہے ہیں جسے وہ نہیں جانتے۔ اس طرح ہم انہیں اُس خُدا سے متعارف کرواتے ہیں جسے ہم واقعی جانتے ہیں ۔

19 مئی 2020 کو ایک ارب سے زیادہ مسلمان اپنے گھروں میں روزے رکھنے اور دعا کرنے کے لئے اکٹھے ہوئے ۔سن 622 عیسوی کے بعد یہ پہلا موقع تھا کہ مسجدیں کرونا وائرس کی وجہ سے بند تھیں ۔ انہوں نے اُس شبِ قدر میں خُدا سے گناہوں کی معافی کے لئے خاص دعا کی۔ اُسی وقت 57 1ممالک میں 3کروڑ 80 لاکھ سے زیادہ یسوع کے ماننےوالے، جو اُس سے پہلے مسلمان تھے، یہ آواز بلند کر کے دعا مانگنے لگے کہ واحد سچا زندہ خُدا نشانیوں، معجزوں، نبوتوں اور رویا کے ذریعے دنیا بھر کے مسلمانوں پر آشکار ہو۔ انہوں نے روح القدس کی قوت سے پہلی مرتبہ یہ دعا کی کہ مسلمان اُس رحم، محبت اور معافی کو سمجھ سکیں جو صرف یسوع مسیح میں ملتی ہے ۔اور معجزے کی اس رات میں خُدا نے ہماری دعائیں سُن لی ۔

جب ہم متفق ہو کر دعا کرنے کے لئے آسمانی تخت تک پہنچتے ہیں ہم یسوع کو اپنی ترجمانی کرنے کے لئے التجا کرتے ہیں –تو اس کے ذریعے ہمیں صحیح وقت اور صحیح مقام پر روحانی گفتگو کرنے کی اہلیت حاصل ہوتی ہے ۔ اس کے بعد ہم توقع کر سکتے ہیں کہ معجزے رونما ہونے لگیں گے۔میں آپ کو ایک واقعہ سُنانا چاہتا ہوں  جو اس سال رمضان کے مہینے میں پیش آیا ۔ ہم نے اُس دوران کئی گاؤں اور دیہات میں اپنی ٹیمیں بھیجیں اور خُدا سے دعا کی کہ وہ ہمارے لئے دروازوں اور دلوں کو کھولے۔ ایک ٹیم ایک ملک میں گئی ( میں معذرت چاہتا ہوں کہ سیکیورٹی کی  وجوہات کی بنا پر میں اُس ملک کی   تفصیلات سے آپ کو آگاہ نہیں کر سکتا ) اور وہاں وہ ایک ایسے گاؤں میں پہنچے جہاں  کسی نے انہیں قبول نہ کیا  ۔کسی نے اُن کے لئے دروازہ نہ کھولا اور  نہ ہی کسی نے انہیں مہمان بنایا ۔

دن کے اختتام تک ساری ٹیم کا حوصلہ بہت پست ہو چکا تھا ۔ وہ گاؤں سے باہر جا کر ایک درخت کے نیچے بیٹھے اور خود کو گرم رکھنے کے لئے آگ کا الاؤ روشن کر لیا ۔انہوں نے دعا کر کے خُدا سے یہ پوچھنا شروع کیا کہ انہیں اُس گاؤں میں کامیاب آغاز کرنے کے لئے کیا کچھ کرنا ہو گا ۔ پھر رات ڈھلی تو وہ سب سو گئے۔ کچھ دیر بعد وہ سب جاگ اُٹھے اور ایک راہنما نے ایک بھڑکتی ہوئی آگ اپنی جانب آتے دیکھی۔  ہوا یہ کہ 274 لوگ اپنے ہاتھوں میں مشعلیں تھامے اُن کی جانب آ رہے تھے ۔ پہلے تو ساری ٹیم خوف کا شکار ہو گئی۔ حتیٰ کہ  ایک نے کہا ،” دیکھو ہم تو دعا کر رہے تھے کہ ہمیں اس گاؤں میں جا کر یسوع کی خوشخبری دینے کا موقع ملے، پر اب پورا گاؤں ہی ہماری طرف آ رہا ہے !” 

اُن کے قریب پہنچ کر اُن 274 لوگوں میں سے ایک آگے بڑھا اور کہا ،” ہم نہیں جانتےتم کون لوگ ہو ، ہم نہیں جانتے کہ تم کہاں سے آئے ہو  اور آج جب تم ہمارے گاؤں میں آئے تو ہم نے اپنے گھروں کے دروازے تمہارے لئے نہیں کھولے ۔لیکن آج رات ہم سب نے ایک ہی خواب دیکھا ۔ اُس خواب میں ہمیں ایک فرشتہ نظر آیا جس نے ہم سے کہا ” یہ لوگ جو تمہارے گاؤں میں آئے ہیں ان کے پاس سچائی ہے ۔ جاؤ اور اُن سے پوچھو اور جو کچھ وہ کہیں و  ہی کرو”۔

یہ ہی وہ خاص لمحہ تھا :صحیح لوگوں کے ساتھ، صحیح وقت پر اور صحیح مقام پر روحانی گفتگو کا آغاز ہو ا ،اور رات ختم ہونے سے پہلے گاؤں کے تمام گھروں   سے آنے والے 274 سربراہوں نے اپنا مذہب چھوڑ کر ایمان قبول کر لیا اور یسوع کے ساتھ رشتہ جوڑ کر چلنے کا فیصلہ کیا ۔یہ ہوتی ہے دعا اور صحیح  مقام پر روحانی گفتگو کی طاقت ۔

آخر میں مَیں آپ کو مسلمانوں کے درمیان تحریکوں کے آغاز کے بارے میں ایک اور کہانی بھی  سُنانا چاہتا ہوں ۔اس کے پیچھے یہ تصور کار فرما ہے  کہ مسیحی کارکن یا مشنری  اس چیز کا ذمہ دار نہیں ہے کہ وہ چرچ قائم کرے ۔اُس کی ذمہ داری ایک کرنیلیس  کی تلاش کر کے اُسے مہارتوں سے آراستہ کرنا اور تربیت دینا ہے، جو خود اس کام کی افزائش کر سکے ۔کئی مہینے پہلے کچھ راہنما میرے پاس آئے اور کہنے لگے، “کچھ ایسے گاؤں ہیں جہاں تک ہم رسائی حاصل نہیں کر سکے اور عمومی طریقے استعمال کر کے ہم اُن تک کبھی رسائی حاصل نہیں کر سکیں گے۔ سو ہم نے دعا کی اور ہم نے محسوس ہوا کہ روح القدس ہم سے کہہ رہا ہے کہ ایسی ٹیمیں مخصوص کر لیں جو صحرا کے پار جا کر اس بات کو یقینی بنائیں کہ تمام نارسا لوگ خوشخبری سُن لیں “۔

میرے اور آپ کے پاس موقع ہے کہ ہم مسلمانوں کے درمیان تحریکوں کا آغاز کریں ۔اس کی ابتدا اُن لوگوں کی تربیت سے ہوتی ہے جو اُس مقام اور اُس تہذیب سے قریب تر ہوں۔ ہم ایک کر نیلیس کی تلاش کرتے ہیں جسے ڈھونڈ کر ہم اُسے وقت اور تربیت دیتے ہیں ۔   پھر یہ شخص یہ سمجھنے میں ہماری مدد کرتا ہے کہ ہم کس طرح اُس کے دوستوں کو متحرک کر کےمزید دوستوں کو خوشخبری سُنا سکتے ہیں ۔ یہ مقام  مشرق وسطیٰ کے صحراؤں میں بھی ہو سکتا ہے، جہاں  اونٹوں پر بھی بیٹھ کر جانا پڑےگا۔ اگر ہم خود سامنےآنے کی بجائے مقامی چرچوں کو وہ اختیار دیں کہ وہ خُدا کی دی ہوئی ذمہ داریوں سے آگاہ ہو سکیں تو ہم ایسے برنباس بن جاتے ہیں جو اُن شاگردوں کو تعاون فراہم کرتے ہیں جو بھیجے جانے والے ہوتے ہیں۔ سو میں یہ کہوں گا کہ ہماری ذمہ داری لوگوں کو تربیت کے ذریعے  وسائل اور مہارتوں سے آراستہ کر کے اعتماد قائم کرنا ہے ۔ وہ راہنما متعین کریںگے اوردوسری قوموں میں  خوشخبری پھیلانے کے لئے  چرچز کی تخم کاری کر کے اُن کی افزائش کریں گے ۔ 

مختصراً یہ ،کہ  میرا خیال   ہے کہ مسلمانوں کے درمیان تحریکوں کا  آغاز اسی طرح سے  بہترین طور پر ہو سکتا ہے ۔سب سے پہلے اعمال کی کتاب کا ماحول  تخلیق کر کے اعمال  کی کتاب جیسی ابتدائی کامیابی حاصل کی جا سکتی ہے ۔ دوسرے یہ کہ مسلمانوں کے درمیان تحریکوں کے آغاز کے لئے ہمیں اپنے بیانیے میں  ترمیم کرنی چاہیے  تاکہ روح القدس کی راہنمائی میں ہم صحیح لوگوں کو صحیح وقت اور صحیح مقام پر چھو سکیں ۔

اس کی بجائے کہ ہم لوگوں کو اپنے چرچ میں شامل ہونے پر زور دیں، ہمیں چاہیے کہ ہم انہیں یسوع مسیح میں بپتسمہ دے کر یہ دریافت کرنے کے لئے چھوڑ دیں کہ اُن کا اپنا چرچ کیسا ہونا چاہیے۔ ضرورت ہے کہ ہم  خُدا سے ایک کر نیلیس کے لئے دعا کریں جو کوئی بھی بااثر مرد یا عورت ہو سکتا ہے۔   پھر وہ  اپنے پہلے سے موجود بااثر تعلقات کو استعمال کر کے خُدا کی بادشاہی کی افزائش کرے۔ جب آپ مسلمانوں کے درمیان تحریکوں کے آغاز کا سوچیں تو میں چاہوں گا کہ آپ تربیت کے ذریعے مہارتیں فراہم کریں اور اعتماد کی فضا قائم کریں۔  ایک ہی چرچ ہو جو قریبی چرچوں کے ساتھ منسلک ہو تاکہ مل کر آپ نارسا اور غیر سرگرم قوموں تک پہنچیں اور یہ دیکھیں کہ ایک کرنیلیس آپ کے ساتھ مل کر کس طرح خُدا کی بادشاہی کی افزائش کرتا ہے ۔ خُدا کا فضل آپ پر ہو۔

وبا اور غیر یقینی صورت حال کے دوران بھی خُدا اپنا کام کر رہا ہے اُس کا روح دنیا بھر میں لوگوں کی زندگیوں میں متحرک ہے ۔

لوگ اپنے گھروں میں قید ہیں اور اکثر تنہا بھی ہوتے ہیں ۔اور اُن کے ذہنوں میں بہت سے سوالات ہوتے ہیں ۔ بہت سے لوگ جذباتی دباؤ کی وجہ سے سامنے آنے والے چلینجز کا جواب تلاش کر رہے ہیں ۔ ان سوالوں کے جواب تلاش کرنے کا ایک ذریعہ انٹر نیٹ بھی ہے۔گوگل پر سرچ کرنے والے، یو ٹیوب پر ویڈیو دیکھنے والے ، فیس بُک پر مختلف کمنٹس کرنے والے اور ایسی بہت سی سماجی رابطوں کی ویب سائٹ پر آن لائن آنے والے لوگوں کی تعداد بڑھتی ہی چلی جا رہی ہے ۔ فیس بُک استعمال کرنے والوں کی تعداد 2 بلین سے زیادہ ہے اور گوگل کے بعد دوسرا بڑ ا سرچ انجن یو ٹیوب ہے ( یو ٹیوب دراصل گوگل ہی کی ملکیت ہے)  سوشل میڈیا کے بڑھتےہوئے استعمال سے  سوشل میڈیا کے ذریعے خدمت اور شاگرد سازی  کے مواقع بھی بڑھ رہے ہیں ۔

خُدا واقعی تلاش کرنے والوں کے لئے  انجیل کے دروازے کھول رہا ہے ۔

ایک کے ساتھ بہت سے چلے آتے ہیں 

خُدا نےسوشل میڈیا پر منادی کے ایک اشتہار کے ذریعے ازیبدین کے ذریعے انجیل کا  دروازہ کھولا ۔اُس نے اشتہار کا جواب دیا اور وہ بیشارہ نامی ایک مقامی شاگرد ساز کے ساتھ منسلک ہو گیا۔ بیشارہ نے ایک سال قبل ایمان قبول کیا تھا اور وہ ہر سُننے والے کو بڑی گرم جوشی کے ساتھ اپنے ایمان میں شریک کرتا ہے ۔ اس کے نتیجے میں 300 سے 400 کے قریب افراد ایمان کے دائرے میں آ گئے ہیں، جن کا تعلق ایمان کے 30 مختلف گروہوں سے ہے۔ اپنے ایمان کی وجہ سے بیشارہ کو بے حد ایذارسانی کا سامنا ہے ۔ لیکن اُس نے اپنا ہاتھ نہیں کھینچا اور آج کل وہ اذیبدین کی  شاگرد سازی کر رہا ہے تاکہ وہ خدمت کے کام کے لئے تیار ہو جائے ۔ 

آپ اکیلے نہیں ہیں ۔

ایشیا کے ایک علاقے میں کالج کے طلبا کے لئے خُدا نے جیزس فلم کے  ویڈیو کلپس کے ذریعے انجیل کا دروازہ کھولا ،جنہیں سوشل میڈیا پر ایک اشتہاری مہم میں استعمال کیا گیا تھا ۔ ایک طالب علم نے اشتہار کا جواب دیتے ہوئے کہا ” میرا خیال تھا کہ شاید اس وبا کے دوران صرف میں ہی خود کو اتنا تنہا محسوس کر رہا ہوں۔ اور پھر میں نے آپ مسیحیوں کے بارے میں اور ہمارے لئے آپ کی محبت کے بارے میں سُنا ” یہ طالب علم مسیح کی محبت کے بارے میں سُننے والا واحد فرد نہیں تھا ۔ ان اشتہارات کا جواب دے کر کم از کم 3 لوگوں نے مسیح کو قبول کر لیا ہے ۔ 

ایک اور اشتہاری مہم میں پوچھا گیا ،” آپ خُدا سے کس قسم کی دعا کی قبولیت کی درخواست کریں گے ؟”  سینکڑوں طلبا نے جواب میں مختلف دعائیں لکھیں مثلا “خُدایا مہربانی فرما کر مجھے معاف کر دے ” ،” خُدایا مجھے اُن چیزوں سے نجات دلا جو مجھے خوفزدہ کرتی ہیں ”  ” اے خُدا میری زندگی میں کسی ایسے کو لے آ جو مجھے سمجھتا ہو اور مجھ سے محبت کرتا ہو ” ” اے خُدا مجھے بتا کہ میں درست انتخابات کیسے کروں ” 

نارسا لوگ رسائی کے لئے نکل رہے ہیں 

 سوشل میڈیا کے ذریعے نارسا علاقوں میں بہت سے لوگوں کو یہ موقع مل رہا ہے کہ وہ ایسے لوگوں کے ساتھ منسلک ہو سکیں جنہیں انجیل کی خوشخبری سُنائی جاسکتی ہے ۔ مثال کے طور پر فیس بُک کے ایک منسٹری کے پیج نے جنوب مشرقی ایشیا کے ایک نارسا گروہ سے 1800 فالورز جمع کر لئے ۔مقامی مسیحی ایسے لوگوں کے ساتھ رابطے میں ہیں جو انجیل میں دلچسپی رکھتے ہیں اور کم ازکم ایک شخص کو پہلے ہی بپتسمہ دیا جا چکا ہے ۔

 یہ کوئی اتفاق نہیں ۔

خریدے گئے تشہیری مواد اور بنا ادائیگی کے پوسٹ کئے جانے والے  مواد کے ذریعے لوگ یسوع کے بارے میں سُن رہے ہیں ۔ 99.99 فیصد مسلم آبادی والے ایک ملک میں زرائع ابلاغ استعمال کرنے والی ایک ٹیم کو مندرجہ ذیل پیغام پہنچا کہ جس کے ذریعے وہ متلاشیوں کی تلاش کر سکتے ہیں : ” فیس بُک اور انسٹاگرام اور یو ٹیوب پر ہر جگہ مجھے یسوع کے بارے میں چیزیں نظر آتی ہیں ۔میرے خیال کے مطابق یہ کوئی اتفاق کی بات نہیں۔ میں سوچتا ہوں کہ میں یسوع پر ایمان لا سکتا ہوں ۔ میں سوچتا ہوں کہ کیا ہی اچھا ہو اگر میں ایک معجزہ دیکھ سکوں ۔ 

غیر معمولی دور اور مہارتیں 

چرچ کی ابتدا سے ہی لوگ خوشخبری پھیلاتے رہے ہیں ہم پورے دن میں اپنے کام کی جگہ ، سکولوں اور دیگر جگہوں پر لوگوں سے میل جول کے دوران اپنے اندر موجود اُمید پھیلاتے رہتے ہیں ۔ انٹر نیٹ کی قوت اور وسعت استعمال کرنے کے ذریعے اب ہم اس قابل ہو گئے ہیں کہ یہ ٹیکنالوجی ہمیں 24 گھنٹے دور دراز کے علاقوں تک رسائی دیتی ہے۔ حتیٰ کہ جب ہم سو بھی رہے ہوں تو خُدا کا روح کام کر رہا ہوتا ہے اور اُن متلاشیوں کو ہماری جانب لا رہا ہوتا ہے جن کو ہم خُدا کے بیٹے یسوع مسیح کا پیغام دے سکتے ہیں۔

 ڈیجیٹل وسیلوں کے ذریعے رسائی  ہماری ذاتی مشنری زندگی کا متبادل تو نہیں لیکن وہ ہمیں مسیحی کارکنوں تک پہنچنے کا ایک نیا انداز پیش کرتی ہیں۔ یہ متلاشی ایسے لوگوں سے رابطے کر رہے ہیں جو اُن کے ساتھ آف لائن اور آن لائن دونوں طرح سے گفتگوشروع کر سکتے ہیں ،جس کے نتیجے میں ایک شاگرد بن سکتا ہے جو بعدازاں مزید شاگردوں کو تیارکرنے کے قابل ہوتا ہے ۔

یہ کوئی جادوئی گولی نہیں ۔

ڈیجیٹل طریقوں کے ذریعے رسائی کوئی جادو کی گولی نہیں ایسا نہیں ہو سکتا کہ ہم رقم ادا کر کے ایک اشتہار پوسٹ کریں اور اُس کے بعد یہ توقع رکھیں کہ ہزاروں لوگ نجات پائیں گے ۔ ڈیجیٹل  وسیلوں سے بہترین فوائد حاصل کرنے کے لئے بہت زیادہ غور و فکر تربیت اور حکمت عملی مرتب کرنے کی ضرورت ہے ۔لیکن وہ لوگ جو پہلے سے ہی اس شعبے میں کام کر رہے ہیں، وہ اس موثر مہارت کو استعمال کر کے خُدا کو جلال دے سکتے ہیں اور اُس کی بادشاہت کی پیش روی کا  سبب بن سکتے ہیں ۔

اگر آپ سماجی رابطوں   کی سائٹ اور زرائع ابلاغ کے ذریعے متلاشیوں کی تلاش کرنے کے بارے میں  تجسس رکھتے ہیں  تو بہت سی منسٹریاں موجود ہیں جو آپ کی تربیت کرنے کے ساتھ ساتھ ایسے زرائع ابلاغ استعمال کرنے والے مسیحی کارکنوں کے لئےوسائل بھی فراہم کرتی ہیں۔ اُن میں سے چند یہ ہیں :

میڈیا ٹو موومنٹس

میڈیا ٹو موومنٹس شاگرد سازوں کی ٹیموں کو ایسی مہارتیں  فراہم کرتی ہیں جن کے ذریعے روحانی متلاشیوں کی شناخت کر کے، اُنہیں تیزرفتاری کے ساتھ شاگرد ساز بنانے کی تحریکیں شروع کی جا سکتی ہیں ۔یہ تنظیم اس سلسلے میں ابتدائی اقدامات کے لئے کوچنگ اور تربیت فراہم کرتی ہے 

www.Mediatomovments.org

کنگڈم ٹریننگ

یہ گروپ کئی سال سے ڈیجیٹل وسائل کے ذریعے رسائی میں مشغول ہے اور اس کام کی ابتدا کرنے والوں کو بہترین کورسز کے ذریعے معاونت فراہم کرتا ہے ۔ www.kingdom.training 

مشن میڈیا یو 

ایم ایم یو ایک ایسا آن لائن تربیتی پلیٹ فارم ہے جس میں کوچنگ کے ذریعے یسوع کے پیروکاروں کو موثر طور پر شاگرد سازی اور چرچز قائم کرنے کی تربیت دی جاتی ہے ۔یہ تربیت میڈیا کہانیوں اور جدید ٹیکنالوجی کے استعمال پر مبنی ہے ۔ 

www.missionmediau.org/foundations-of-media-strategy

کوانا میڈیا 

یہ تنظیم ،مشنری ٹیموں اور چرچز کو اپنے اپنے تناظر میں متلاشیوں کی مدد دینے کی مہارت رکھتی ہے ۔ یہ تربیت، مواد کی تخلیق، اشتہاری مہمات کےانتظام اور تربیت کے ماہر ہیں ۔ یہ تنظیم ہفتہ واری بنیادوں پر میڈیا میں ایک پوڈ کاسٹ بھی چلاتی ہے:” کرسچن میڈیا مارکیٹنگ  ” www.Kavanahmedia.com

میڈیا ٹو موومنٹس، کنگڈم ٹریننگ اور مشن میڈیا یو کے اشتراک نے ایک ویڈیو ترتیب دی ہے جس میں بتایا گیا ہے کہ یہ ٹیمیں کس مقصد کے لئے کام کر رہی ہیں۔ اس ویڈیو کا عنوان what is media out reach ہے اور یہ تعاون اور اشتراک کی ایک بہترین مثال پیش کرتی ہے ۔

جن گروپوں کا اوپر ذکر کیا گیا ہے اُن سب کی حکمت عملی ذہن میں ایک مقصد رکھ کر ترتیب دی جاتی ہے :شاگردوں کی افزائش در افزائش ۔تحقیق کی بنیاد پر تیار کئے گئے، تخلیقی اور تہذیبی اقدار سے مناسبت رکھنے والےمواد ، ویڈیو اور سوشل میڈیا کی پوسٹس  کو اگر مارکیٹنگ کی تزویراتی  حکمت عملیوں کے ساتھ استعمال جائے تو اس کے ذریعے لوگ کلام کے متلاشی بن کر اُس کا جواب دینے لگتے ہیں۔ میری دعا ہے کہ ہم بنی اِشکار کی طرح(  1۔ تواریخ 32: 12 )زمانے کو سمجھیں اور تمام موثر وسائل استعمال کرتے ہوئے سب کو مسیح کی محبت قربانی اور معافی کے بارے میں بتائیں ۔