علامات 

1۔ عہد – نقطوں والے دائرے کی بجائے ٹھوس لکیر والا دائرہ 

2۔ بپتسمہ – پانی 

3۔ کلام –کتاب

4۔ خُداوند کا کھانا یا پاک شراکت – ایک کپ

5۔ رفاقت – دل 

6۔ نذرانہ اور خدمت – روپے کی علامت

7۔ دعا – دعا میں اُٹھے ہاتھ

8۔ حمدو ثنا – اوپر ہو اُٹھےہوئے ہاتھ 

9۔ منادی – ایک دوست دوسرے کا ہاتھ تھامے ہوئے، ایمان کی جانب اُس کی راہنمائی کرتا ہوا۔

10۔رہنُما –  دومسکراتے چہرے    

آخر میں آپ اپنے چرچ کو ایک نام دے سکتے ہیں ۔اس طرح آپ کو اپنے علاقے میں چرچ کی ایک شناخت قائم کرنے میں مدد ملتی ہے ۔ یاد رکھیں کہ آپ کا اصل مقصد کئی نسلوں پر مبنی چرچ کی تخم کاری کی تحریک کی افزائش کرنا ہے جو کہ چوتھی اور اُس کے بعد کی نسل تک 

چلتی جائے ۔ سو اس عمل میں نسل کا نمبر بھی شامل کیجیے تاکہ آپ دیکھ سکیں کہ آپ خُدا کو اپنے علاقے میں ایک تحریک کا آغاز کرتے ہوئے دیکھ رہے ہوں ۔ 

اس موقع پر یہ جاننا کافی آسان ہو جاتا ہے  کہ وہ کیا چیزیں ہیں جو کہ گروپ کو ایک چرچ بننے سے روک رہی ہیں۔ ہو سکتا ہے کہ اُن میں کسی چیز کی کمی ہو لیکن اب آپ اس گروپ کو ایک چرچ کی صورت میں ڈھلتے دیکھ رہے ہوتے ہیں اور وہ خود بھی یہ دیکھ سکتے ہیں ! یہ انتہائی متاثر کُن اور عملی سبق ہے جو گروپ کو اس بات میں مدد دیتا ہے کہ وہ خود ہی سوچیں اور چرچ کے باہر کے دائرے سے عناصر کو چرچ کے اندر تک لائیں۔ اس طرح سے گروپ کو ایک واضح عملی منصوبہ بندی متعین کرنے میں مدد ملتی ہے ۔ 

چرچز کی نسلیں

ضروری ہے کہ آپ  اپنے زیر تربیت شاگردوں کو ایسی تربیت دیں کہ وہ بامقصد  انداز میں گروپوں کو چرچ بننے میں مدد دینے کے قابل ہو جائیں۔ اس مقصد کے حصول کے لئے ایک خاص مرحلے پر مختصر مدتی شاگرد سازی کے عمل میں  چرچ کی تشکیل کے بارے میں ایک مخصوص سبق شامل کرنا ضروری ہے ۔چرچ ہیلتھ میپنگ بھی آپ کو اس عمل میں مدد دے سکتی ہے ۔اس صورت  میں چرچ کی تشکیل شاگرد سازی کے عمل کا ایک فطری مرحلہ بن جاتی ہے ۔ اور ساتھ ہی آپ چرچ کی تخم کاری کی تحریک کا ایک بڑا اہم سنگ ِمیل بھی عبور کر لیتے ہیں۔ کیا ہی خوبصورت اور پُر جوش لمحہ ہو گا جب ایمانداروں کی کئی نسلیں، نئے ایمانداروں کو چوتھی یا پانچویں میٹنگ کے بعد نئے چرچز میں ڈھال رہی ہوں ۔ جب یہ عمل نئے چرچز کی چوتھی نسل تک پہنچ جاتا ہے  تو چرچ کی تخم کاری کی تحریک اُبھر جاتی ہے ! 

اگر آپ کے پاس چرچ کی تشکیل کا سبق یا ایک گروپ کو چرچ میں ڈھالنے کا ایک با مقصد اور قابلِ  افزائش طریقہ موجود نہ ہو تو پھر آپ بڑی تعداد میں نئے چرچز کے قیام کی توقع نہیں کر سکتے !

اگر آپ ابتدا سے ہی چرچ کی تشکیل کے بارے میں سبق اور چرچ کی تخم کاری کا ایک سادہ اور بامقصد  طریقہ کار اپنی تربیت میں شامل کریں ۔ تو آپ چرچ کی نسل درنسل  افزائش کی توقع کر سکتے ہیں !

ہو سکتا ہے کہ آپ ابھی پوری طرح اس عمل سے واقفیت نہ رکھتے ہوں ۔ ہو سکتا ہے کہ یہ عمل آپ کے چرچ یا منسٹری کے اصولوں کے بھی خلاف ہو۔ لیکن خُداکی بادشاہی لانے کی خاطر اپنی روایتوں اور اصولوں کی قربانی دینے سے نہ جھجکیں ۔ اس عمل کے ذریعے ہمیں اعمال کی کتاب میں مذکور  ابتدائی اور اصل شاگردسازی کے انقلاب تک پہنچنے میں بہت مدد ملتی ہے۔ اس سے ہمیں تاریخ کی ایک بہت بڑی اور متاثر کُن  تحریک تک پہنچ جانے میں مدد ملتی ہے ۔ یہ ایک ایسا عمل ہے جو ہمیں روح القدس کے ساتھ پوری طرح شراکت اور معاونت میں مدد دیتا ہے ۔

 اس عمل کی بامقصدیت اور سادگی کے باعث کوئی بھی  ایماندار روح القدس کی قوت سے معمور ہو کر چرچ کی تخم کاری کرنے والا بن سکتا ہے ۔ چرچز کا محض آپ کے مشن کے میدان میں پھیلاؤ  ہی ضروری نہیں۔ ان کا پھیلاؤ گھروں  ، کمیونٹی سنٹروں  ،سکولوں،  پارکوں ،چائے خانوں اور پوری دنیا میں ہونا ضروری ہے ۔ خُدا کی بادشاہی جلد آئے !

جنوب مشرقی ایشیا کی ایک ٹیم کے ساتھ کام کے دوران چار قسم کی امداد کا استعمال

جب میں جنوب مشرقی ایشیا کی ایک ٹیم کے ساتھ چار قسم کی امداد کے عمل پر کام کر رہاتھا تو ہم چوتھی  مدد تک پہنچے جسے چرچ ہیلتھ میپنگ یا مختصرا  ًچرچ کے دائرے کہا جاتا ہے۔ میں نے کافی عرصے سے خدمت میں مشغول ایک کارکن کو وائٹ بورڈ کی جانب بُلایا۔ میں نے اُس سے کہا کہ وہ کلاس کو یہ بتائے کہ ایمانداروں کا ایک چھوٹا گروپ کیسا ہوتا ہے ۔ جب وہ اس مختصر سے بائبل سٹڈی گروپ کے بارے میں بتا رہا تھا تو میں نے اُسے وائٹ بورڈ پر نقطوں والے ایک دائرے  کے ساتھ ایک شکل کی صورت میں ظاہر کیا۔ اعمال کی کتاب 2: 37-47 کا مطالعہ کرتے ہوئے میں نے اُس سے کہا کہ وہ اعمال کی کتاب کے ابتدائی چرچ کے اُن عناصر کا جائزہ لے جو اُس چھوٹے گروپ میں باقاعدگی سے شامل ہیں ۔ اگر وہ عنصر باقاعدگی سے شامل ہو  تو ہم اُسے ایک علامت کی صورت میں دائرے کے اندر  بناتے تھے اور اگر وہ شامل نہ ہوتا تو ہم اسے دائرے کے باہر بناتے رہے ۔

 گروپ سے چرچ کی جانب سفر کا یہ جائزہ ختم ہونے کے بعد وہ شکل واضح طور پر چند خامیوں یا کمزوریوں کی نشاندہی کر رہی تھی ۔ وہ گروپ نہ تو پاک شراکت سے متعارف تھا اور نہ ہی  وہ ضروریات پوری کرنے کے لئے  نذرانے دے رہاتھا۔ ان دونوں عناصر کی  اشکال نقطوں والے دائرے کے باہر تھیں  ۔ میں نے پاک شراکت کی علامت کے ساتھ ایک تیر کا نشان بنایا جس کا رُخ دائرے کے اندر کی طرف تھا اور پھر میں نے اپنے ساتھی سے پوچھا : ” اس گروپ کو پاک شراکت کا آغاز کرنے کے لئے کیا کرنا ہو گا ؟” اُس کارکن نے کچھ دیر سوچا  پھر اُس نے کہا کہ جب وہ اپنی خدمت کے مقام پر واپس پہنچے گا تو وہ آئندہ ہفتے میں گروپ کے لیڈر کو پاک شراکت کا عنصر شامل کرنے کے لئے مناسب طور پر اور آسانی سے کہہ سکے گا۔ جیسے جیسے وہ ساتھی جواب دیتا گیا تو میں نے تیروں کے نشان کی  مدد سے اُن کے مستقبل کے لئے منصوبے کا خلاصہ تیار کر دیا ۔

ایساہی تیر کا نشان میں نے نذرانے کی علامت کے ساتھ بھی بنایا پھر ان تمام منصوبوں کو عمل میں لانے کے لئے غور و فکر کے بعد میں نے عمل کے لئے ایک حکمت عملی مرتب کر لی ۔

آخر میں ہم مرکزی سوال کی طرف پہنچے : ” کیا یہ مختصر گروپ خود کو ایک چرچ کا نام دے سکتا ہے؟ ” کچھ دیر سوچنے کے بعد اُس کارکن نے فیصلہ کیا کہ ایسا نہیں ہے۔ میں نے یہ تجویز پیش کی کہ اگر وہ گروپ پورے دل سے ایک چرچ بننے کے عہد پر کاربند ہوجائے تو انہیں چرچ کی حثیت سے شناخت بھی ملےگی اور وہ حقیقی معنوں میں چرچ بھی بن جائیں گے۔ اگر ایسا ہوجائے تو نقطوں سے بنا ہوا یہ دائرہ ایک ٹھوس لکیر کے دائرے میں تبدیل ہوجائے گا  ۔ پھر میں نے اُس کارکن سے پوچھا کہ یہ سب کرنے کے لئے کیا کرنا ضروری ہو گا۔  اُس کا خیال یہ تھا کہ انہیں ایک مختصر گروپ سے ایک مکمل اور اصل چرچ بننے کے عمل تک پہنچنے کے لئے دو چیزوں کی ضرورت ہے ۔سب سے پہلے انہیں اعمال کی کتاب کے 2 باب کی  37 سے 47 آیات کا گہرا مطالعہ کرنا ہے۔ اور اُس کے بعد اُسے اُن کی مدد کرنی ہے تاکہ خُدا اور ایک دوسرے کے ساتھ ایک ٹھوس اور مضبوط عہد کر لیں۔ میں نے یہ عملی منصوبہ نقطوں سے بنے اُس دائرے پر لکھ لیا جو اُس گروپ کی ترجمانی کرتا تھا ۔

وہ کارکن اور پورا گروپ وائٹ بورڈ پر بنے عملی منصوبوں کو بہت  پُر جوش انداز میں دیکھ رہے تھے۔ یہ تمام منصوبے قابلِ عمل تھے ۔ درحقیقت اُس کارکن نے فیصلہ کیا کہ وہ یہ تمام اقدامات اگلے ہی ہفتے دو مختصر گروپوں کے ساتھ کرے گا، جو اُس کے گروپ  جیسے ہی تھے۔ ایک دور افتادہ علاقے میں خدمت کرنے والا یہ کارکن جو ش اور جذبے سے کانپ رہا تھا ۔گذشتہ سات سال سے وہ اور اس کا خاندان پورے علاقے میں کلام پھیلانے کا کام کر رہے تھے ۔ انہوں نے مقامی شراکت داروں کی تربیت کی تھی اور نئے ایمانداروں کو گروپوں میں شامل کر کے اُن کی  شاگرد سازی بھی کر رہے تھے۔ اس تمام عرصے کے دوران اُن کی یہ خواہش  کہ یہ گروپ چرچ میں تبدیل ہو جائیں، پوری نہیں ہو سکی تھی۔ اب ایک سادہ لیکن بامقصد طریقے کے زریعے وہ جلد ہی پہلے چرچ کی ابتدا دیکھنے والے تھے ۔

اُس تربیت کے تقریبا ایک سال کے بعد ،گذشتہ ہفتے میں اُس کارکن سے دوبارہ ملا ۔نہ صرف وہ گروپس اب چرچز میں ڈھل چکے ہیں بلکہ وہ نئے گروپوں کو بھی چرچ بننے کے اس عمل سے گزرنے میں مدد دے رہے ہیں۔